सुर्खेत । कर्णाली प्रदेशमा नेकपा माओवादी केन्द्रबाट बिन्दमान विष्ट मन्त्री बन्ने भएका छन् । कर्णाली प्रदेशको कांग्रेस नेतृत्वको सरकारमा विष्ट पहिलो पटक मन्त्री बन्ने भएका हुन् । उनले मंगलबार बेलुका नै सपथ लिने कार्यक्रम छ ।

विष्टलाई आर्थिक मामिला तथा योजना र भौतिक मन्त्रालयमध्ये कुन मन्त्रालय दिने अझै टुंगो लागेको छैन । यसअघि महेन्द्रबहादुर शाही नेतृत्वको सरकारमा हुँदा विष्टलाई मन्त्री नियुक्त गरेर पनि शपथ ग्रहण गर्ने समयमा माओवादी केन्द्रले फिर्ता बोलाएको थियो ।

यसैबीच, कर्णालीका मुख्यमन्त्री जीवनबहादुर शाहीले बुधबार विश्वासको मत लिने भएका छन् । उनले मंगलबार नै प्रदेशसभा बैठकमा विश्वासको मतसम्बन्धी प्रस्ताव पेस गरेका छन् ।

प्रदेशसभा सचिवालयकाअनुसार, मंगलबार प्रमुख प्रतिपक्षी दल नेकपा (एमाले) बैठकमा उपस्थित हुन नसकेपछि विश्वासको मत लिने कार्यक्रम बुधबारका लागि सारिएको हो ।

प्रतिपक्षको सहभागितासहित विश्वासको मत लिने भनेर बुधबारका लागि कार्यतालिका राखिएको काँग्रेस संसदीय दलका प्रमुख सचेतक हिमबहादुर शाहीले बताए ।

मुख्यमन्त्री शाहीलाई विश्वासको मत दिनेबारेमा मंगलबार नै गठबन्धन दलहरुबीच छलफल भएको थियो ।

मुख्यमन्त्री शाहीले माओवादी केन्द्र संसदीय दलका नेता महेन्द्रबहादुर शाही र एकीकृत समाजवादीका कर्णाली प्रदेश इन्चार्ज प्रकाश ज्वालासँग छलफल गरेका हुन् । मुख्यमन्त्री जीवनबहादुर शाहीले विश्वासको मत लिएर मात्र सरकारलाई पूर्णता दिने भएका छन् ।