काठमाडौं । नेकपा (एकीकृत समाजवादी)का अध्यक्ष एवम् पूर्वप्रधानमन्त्री माधवकुमार नेपालले राष्ट्रिय प्रजातन्त्र पार्टी (राप्रपा) लाई परिवर्तनको गतिलाई रोक्ने र पछाडि धकेल्ने काम नगर्न आग्रह गरेका छन् ।

बुधबारबाट काठमाडौंमा सुरु भएको राप्रपाको एकता महाधिवेशनमा बोल्दै नेपालले राप्रपाले उठाएको राष्ट्रियताको झण्डालाई उठाई राख्न र नेपाली जनताको भावना बमोजिम परिवर्तनको संवाहक शक्तिको रुपमा अघि बढ्न पनि सुझाव दिए ।

नेपालमा जातीय सदभाव र राष्ट्रिय एकताको भावना रहेको औंल्याउँदै सोही अनुसार अघि बढेर मुलुकलाई प्रतिगमनतर्फ जान नदिन सबै राजनीतिक दलहरु एकतावद्ध भएर अघि बढनुपर्ने उनको भनाई छ ।

एकीकृत समाजवादीका अध्यक्ष नेपालले इतिहास पछाडि नजाने भन्दै अग्रगमनको बाटोबाट अघि बढ्न पनि राप्रपा नेतृत्वलाई सचेत गराए ।

‘परिवर्तनको गतिलाई रोक्ने र पछाडि धकेल्ने काममा हामी नलागौं । अगाढि बढिसक्यो इतिहास । इतिहास पछाडि जाँदैन अव । तर हाम्रो देशको आफ्नै विशेषता छ । हामीले हाम्रो देशको आफ्नो विशेषतालाई विर्सियौ भने प्रत्येक व्यक्तिको आफ्नो विशेषता हुन्छ । प्रत्येक देशको आफ्नो विशेषता हुन्छ । यो विशेषतालाई बिर्सियौं भने र अरुको नक्कल गर्न थाल्यो भने यसले पनि बिग्रिन्छ ।’– नेपालले भने ।

अध्यक्ष नेपालले वैदेशिक हस्तक्षेपबाट मुलुकलाई जोगाउन नेपालका राजनीतिक दलहरु अहिले पनि सचेत भएर अघि बढनुपर्ने आवश्यक्ता औंल्याए ।