काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी विभाजित भएको छ । नेकपा विप्लवबाट असन्तुष्ट समूहले नेपाल कम्युनिष्ट पार्टी (क्रान्तिकारी) घोषणा गरेका छन् ।

गत कात्तिक २६ र २७ गते रौतहटमा भेला गरी नेकपा क्रान्तिकारी गठन गरिएको सो समूहका प्रचार विभाग प्रमुख अमर गोपालीले बताए ।
भेलाले नेकपा (क्रान्तिकारी) पार्टी गठन गर्दै उत्पादनसहितको शसस्त्र जनविद्रोहको कार्यदिशा पास गरेको बुधबार रिपोटर्स क्लवमा आयोजित पत्रकार सम्मेलनमा गोपालीले बताए ।

नेपाली क्रान्तिको रक्षा गर्दै श्रमजीवी वर्गको मुक्तिका लागि गठन भएको विप्लव नेतृत्वको नेकपाले अवस्तुवादी, अवैज्ञानिक बाटोमा लागेर जनमुक्ति सेना, जनसत्ता, जनअदालत विघटन गरेर दिशाहिन काल्पनिक बाटोमा लागेको गोपालीले आरोप लगाए ।

‘भ्रष्ट दलाल व्यवस्थाले गर्ने जनमत संग्रह नामको चुनावमार्फत बैज्ञानिक समाजवाद ल्याउने अवस्तुवादी, अवैज्ञानिक बाटोमा लागेर जनमुक्ति सेना, जनसत्ता, जनअदालत विघटन गरेर दिशाहिन काल्पनिक बाटोमा लागेर पुर्णत असफल भैसकेको छ ।’– गोपालीले भने ।

नेपालमा अझै क्रान्ति बाँकी रहेकोले जनवादी क्रान्तिको कार्यभार पूरा गर्दै उत्पादनसहितको ‘सशस्त्र जनविद्रोह’ मार्फत पुनः क्रान्तिकारीहरुबीच एकता र ध्रुवीकरण प्रक्रियाबाट समाजवादी राज्य स्थापना गर्नु पार्टीको कार्ययोजना रहेको केन्द्रीय सदस्य गोपालीले स्पष्ट पारे ।

वैज्ञानिक समाजवाद कुनै पनि हालतमा जनमतसंग्रहबाट आउने नसक्ने भन्दै वैज्ञानिक समाजवादको सिद्धान्त आफैले उत्पन्न गर्न पर्ने उनले धारणा राखे । उनले पार्टीले दिएको जिम्मेवारी पुरा गर्न आएको भन्दै उनले पार्टीको ३ पेज लामो अवधारणा पत्र पढेर सुनाएका थिए ।

नवगठित पार्टीको कार्यसमितिमा महासचिव सक्षम, प्रवक्ता सम्भवलाई चयन गरिएको जनाइएको छ ।

त्यस्तै, उक्त पार्टीमा ८१ जनाको केन्द्रीय समिति, १५ जनाको पोलिटब्युरो र ७ जनाको स्थायी कमिटि सचिवालय गठन गरिएको गोपालीले जानकारी दिए ।