काठमाडौं । नेपाली कांग्रेसका बागमती प्रदेशका संसदीय दलका नेता तथा पूर्वमन्त्री ईन्द्रबहादुर बानियाँले पार्टीको बागमती प्रदेश सभापतिमा उम्मेद्धवारी घोषणा गरेका छन् । काठमाडौंमा बुधबार पत्रकार सम्मेलन गर्दै बानियाँले आफ्नो उम्मेद्धवारी घोषणा गरेका हुन ।

बानियाँले बागमती प्रदेशको उन्नती र प्रगतिको लागि आफूले सशक्त र प्रभावकारी भूमिका निर्वाह गर्ने वताए । उनलेभने, हामी १४औं महाधिवेशनमा जुटिरहेका छौं । १६ गते प्रदेश अधिवेशन प्रारम्भ हुँदैछ । कांग्रेसलाई जनमुखी बनाउन र सबैलाई आफ्नो पार्टी भन्ने विश्वास दिलाउनको लागि पनि हामीले भोलिका दिनमा अझै सशक्त भूमिका खेल्नुपर्नेछ ।’

कांग्रेसले आन्दोलन र क्रान्तिलाई विश्राम गर्दै शान्ति र समृद्धिको नेतृत्व गर्नुपर्ने उनले बताए ।

‘कम्युनिष्टबाट सपनाको पोकै पोका,जनतालाई धोकै धोका भयो । हामी त्यस्तो गर्दैनौं । हिजो जनताले कम्युनिष्टलाई प्रचुर बहुमत दिएकै हुन्, तर प्रचुर बहुमत पाएर नेकपाले केही गर्न सकेन् । बरु, जनतामा निराशा छायो,’ उनले भने ,‘कांग्रेसले धर्म र राजा खोज्ने सबैलाई जोड्ने काम गरेको छ ।’

कांग्रेसले गरेको राजनीति जात, धर्म र कुनै संस्थाको नाममा होईन,जनताको सेवाको लागि राजनीति गरेको उनको भनाई छ । उनले बाग्मती प्रदेशमा रहेका ५५ लाख जनताको सुख, सुमृद्धिको लागि आफूले दत्तचित्त भएर काम गर्ने पनि बताए ।