नवलपुर । पूर्वी नवलपरासीमा पनि ‘नो लालपूर्जा, नो भोट’ अभियान थालिएको छ ।

नेपाल बसोबास बस्ती संरक्षण समाजले ‘नो लालपूर्जा, नो भोट’ अभियान सञ्चालन गरेको हो ।

नेपाल बसोबास बस्ती संरक्षण समाज जिल्ला कार्य समिति नवलपुरको आयोजनामा बुधबार नवलपुरको देवचुलीमा सुकुम्बासीहरुले प्रदर्शन गरेका थिए ।

देवचुली नगरपालिकाको देलदलेदेखि नगरपालिकासम्म नो लालपूर्जा नो भोट लेखिएको प्लेकार्ड, ब्यानरसहित सुकुम्बासीहरुले र्याली निकालेका थिए । र्यालीपछि देवचुली नगरपालिकामा विरोध कार्यक्रमको आयोजना गरिएको थियो ।

कार्यक्रममा नेपाल बसोबास बस्ती संरक्षण समाजका केन्द्रीय अध्यक्ष कुमार कार्कीले अब पनि जनतालाई भोटका लागि मात्रै लालपूर्जा दिन्छु भनेर छुक्काउने नेताहरुलाई बहिस्कार गर्ने र अबको चुनाव बहिस्कार गर्ने सम्मको चेतावनी दिए ।

यस्तै, नेपाल बसोबास बस्ती संरक्षण समाज जिल्ला कार्य समिति नवलपुरका अध्यक्ष टिकाराम काफ्लेले नेपालमा चुनावका बेला नेताहरुले धेरै पटक भूमिहिन तथा सुकुम्बासीहरुलाई जग्गा र जग्गाधनि लालपूर्जा दिलाई दिने आश्वासन दिएर भ्रम छर्ने गरेको बताए ।