काठमाडौं । नेकपा एमालेका अध्यक्ष केपी शर्मा ओलीले राप्रपा अध्यक्ष राजेन्द्र लिङदेनलाई भर्खर जन्मिएको बाच्छो हुँदा हिड्न नजानेको टिप्पणी गरेका छन् ।

नेपाली कांग्रेसको १४ औं महाधिवेशनमा शुभकामना मन्तब्य राख्ने क्रममा ओलीले लिङ्देनको अभिब्यक्तिलाई प्रतिवाद गर्दै आलोचनात्मक टिप्पणी गरेका हुन् । ओलीले भर्खर भर्खर अध्यक्ष जितेको भएर लिङदेनले बोल्न नजानेको टिप्पणी गरे । ‘उहाँले विस्तार सिक्दै जानु होला । भर्खर भर्खर हिडेको बाछो रापतापमा हुन्छ । भर्खर भर्खर सभापतिमा छानिएको छ । अलि समयपछि ठिक ठाउँमा आउँला भन्ने लागेको छ । ’ ओलीले भने ।

अध्यक्ष ओलीले देशमा विकास भएको बताएका छन् । ओलीले नेपाल जहाँ रहेको थियो, त्यही नरहेको बताए । उनले देश विकासमा, स्थायित्व, सामाजिक न्यायका पक्षमा कांग्रेससँग एमालेले सहकार्य गरेको बताए । नेपालमा कांग्रेस र एमाले दुई पार्टी रहेको भन्दै ओलीले नेपालमा राणाशासनको अन्त्यदेखि नेपालमा संघीय गणतन्त्रको संविधान ल्याउनसम्म कांग्रेस र एमालेले सँगै सहकार्य गरेको बताए ।

उनले शेर बहादुर देउवालाई प्रधानमन्त्री मात्र नभएर सरकारको नेता हुन पनि शुभकामना दिए । यस्तै अध्यक्ष ओलीले साना दललाई कांग्रेसले हात समाउन छाड्ला भन्ने डर लागेको बताए । उनले माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधव कुमार नेपाललाई लक्षीत गरेर कांग्रेसले हात समात्न छाड्छ कि भनेर उनीहरू डराइरहेको टिप्णी गरे ।