काठमाडौं । नेपाली कांग्रेसका सभापति शेरबहादुर देउवाले १४ औं महाधिवेशनबाट पनि आफूलाई नेतृत्व जिताउन अपिल गरेका छन् ।

पार्टीको शुक्रबारबाट काठमाडौंमा शुरु भएको १४ औं महाधिवेशनको उद्घाटन समारोहमा सम्बोधन गर्दै देउवाले खुला रुपमै भोट मागेका छन् ।
थोरै समय मात्रै लिएका देउवाले आफूलाई फेरि पनि एक भोट दिएर जिताउन आग्रह गरे । ‘मलाई एक भोट दिएर जिताउनुस् । मलाई साथ दिनुस् । फेरि पनि कांग्रेसकै सरकार बताउँछौं ।’ – देउवाले भने ।

‘एउटा कुरा स्पष्ट भन्न चाहन्छु भने–जुन दिन मेरो सरकार बन्यो । त्यो भन्दा अगाडिको दिन हेर्नुस । कस्तो थियो–डर त्रास । देशभरी कस्तो अवस्था थियो ? र म प्रधानमन्त्री भएको भोलिपल्टै सारा मानिसहरुलाई मुक्ति पाएजस्तो भयो । साना मानिसहरुले ओलीको शासनबाट मुुक्ति पाए । त्यस्तो अवस्था थियो । त्यस्तो अवस्थाबाट अव हाम्रो अगाडि त्यो मुक्ति जो पाएका छौं–त्यसलाई बचाउने हो कि नबचाउने हो ?’– देउवाको प्रश्न थियो ।

उनले निर्वाचन सम्म आफ्नो नेतृत्वको सरकार रहिरह्यो भने स्थानीयदेखि केन्द्रीय सरकार पनि कांग्रेसको हुने दाबी गरे ।

‘कांग्रेस सरकार रहिरह्यो भने स्थानीय सरकार कांग्रेसको हुनेछ । कांग्रेस सरकार रहिरह्यो भने केन्द्रीय सरकार कांग्रेसकै हुनेछ ।’– देउवाले भने ।

‘काँग्रेसको सरकार रहिरह्यो भने स्थानीय सरकार काँग्रेसको हुनेछ । काँग्रेसको सरकार रहिरह्यो भने राष्ट्रिय सरकार काँग्रेसको हुनेछ । त्यसका लागि एक पटक मलाई जिताई दिनुहोस् । म कुनै पनि हालतमा यो डरत्रास मुक्त शासन ल्याएर छाडिन्छ । नेपालमा डरत्रासमुक्त शासन ल्याइन्छ । ओलीजस्ता कुनै पनि डरत्रासको शासनबाट मुक्त गरेर डर त्रासबाट मुक्त शासन बनाएर नेपालमा काँग्रेसको सरकार बनाउछु, बनाउछु, बनाउछु, तपाईहरु मलाई साथ दिनुहोस् ।’– देउवाको भनाइ थियो ।

‘तलदेखि माथिसम्म कांग्रेसले जित्छ, त्यो जिम्मा मेरो भयो ।’ –देउवाले भने । अन्तिम वक्ताका रुपमा देउवालाई बोलाइएपछि देउवा आउँदै गर्दा देउवा पक्षधरहरुले देउवाका पक्षमा नाराबाजी गरेका थिए ।

बोल्न शुरु नगर्दै देउवाले नारा नलगाउन पनि आग्रह गरे । उनी बोल्दै गर्दा पनि देउवा पक्षमा नारा लगाउन थालेपछि देउवाले ‘ भयो भयो त्यसो नगर्नुस्, त्यसो नगर्नुस्’ भनेका थिए ।