काठमाडौँ । नेपाली कांग्रेसको १४ औँ महाधिवेशनमा सभापतिका उम्मेदवार डा. शेखर कोइरालाले आफ्नो समूहले जित हासिल गर्ने बताएका छन् । महाधिवेशनमा संस्थापनइतर समूहको नेतृत्व गर्दै सभापतिमा उम्मेदवारी दिएका उनले कार्यकर्ताहरूमाझ यस्तो बताएका हुन् ।

आइतबार बिहान अनुपम फुडल्याण्डमा आफ्नो समूहमा सक्षम र योग्य उम्मेदवार रहेकाले पहिलो चरणमै ५१ प्रतिशत बढी मत ल्याएर जित हासिल हुने बताएका हुन् । उनले विपीले परिकल्पना गरे जस्तो र शुवर्ण शमशेर, गणेशमान सिंह, गिरिजा प्रसाद कोइराला, कृष्णप्रसाद भट्टराई, शुशील कोइरालाले सपना देखेअनुसारको पार्टी तयार गर्न आफ्नो समूह सक्षम रहेको दाबी गरे ।

कांग्रेसमा आवश्यक रुपान्तरण गर्न आफ्नो समूह सक्षम रहेकाले पनि आफूहरुको जित सुनिश्चित रहेको उनको दाबी थियो । उनले उर्जा र अनुभवसहितको आफ्नो टिम कार्यकर्ताले चाहे जस्तो पार्टी बनाउन सक्षम रहेकाले आफ्नो समूहमा मतदान गर्न नेता तथा पदाधिकारीलाई आग्रह गरे ।