काठमाडौँ । नेपाली कांग्रेसको १४ औँ महाधिवेशनमा प्रचारप्रसारका लागि टाँगिएका सामग्रीहरु हटाइएको छ । बुधबार महाधिवेशन स्थल भृकुटीमण्डप परिसरलगायत उपत्यकामा टाँगिएका प्रचारप्रसार सामग्रीहरु केन्द्रीय प्रचारप्रसार समितिले हटाएको हो ।

कांग्रेसको सभापतिका लागि दोस्रो चरणमा भएको मतगणना र परिणाम सार्वजनिक भएसँगै प्रचारप्रसारका लागि टाँगिएका सामग्री हटाउनुका साथै प्रदर्शनीमार्गमा भएको फोहोर सफा गरिएको कांग्रेसका नेता विश्वप्रकाश शर्माले जानकारी दिए । उनले प्रचारप्रसारमा टाँगिएका ब्यानरलगायतका सामग्रीको सरसफाई थालिएको बताएका हुन् । पार्टीको प्रचारप्रसार समितिअन्तर्गतबाट निर्माण गरिएको स्वागत र श्रृंगार समितिका संयोजक गोविन्द पुडासैनीलाई टाँगिएका प्रचार सामग्री हस्तान्तरण गरेर सरसफाई गरिएको हो ।

‘प्रचारप्रसार सामग्री जति हामीले टाँसेका थियौँ, महाधिवेशनको क्रममा प्रचारप्रसार भयो, केन्द्रीय प्रचारप्रसार समितिले उपत्यकाव्यापी एक हप्ते प्रचार अभियान गरेको थियो,’ नेता शर्माले भने, ‘त्यसक्रममा टाँसिएका सामग्री जति छन्, ती सबै सामग्री समितिअन्तर्गत सबै साथी मिलेर सरसफाई गर्ने क्रममा लागेका छौँ ।’

मंसिर २४ गतेबाट शुरु भएको कांग्रेसको महाधिवेशन मंसिर २९ गते बुधबारदेखि सकिएको छ । अझै सभापतिबाहेक पदाधिकारी तथा केन्द्रीय सदस्यको मतगणना बाँकी रहेको छ । पार्टी केन्द्रीय महाधिवेशनबाट प्रधानमन्त्रीसमेत रहेका शेरबहादुर देउवा सभापतिमा विजयी भएका छन् ।