काठमाडौँ । नेपाली कांग्रेसको १४औँ महाधिवेशनअन्तर्गत खुला केन्द्रीय सदस्यको मतगणना सकिएको छ । कांग्रेस केन्द्रीय कार्यालय सानेपामा मतगणना गरिएको थियो ।

कांग्रेस निर्वाचन समितिले मत परिणाम केहीबेरमा सार्वजनिक गर्ने तयारी गरेको छ । ३५ सदस्यका लागि ९९ जनाले महाधिवेशनमा उम्मेदवारी दिएका थिए ।

निर्वाचित भएका ३५ जना खुला केन्द्रीय सदस्यमा २५ जना पार्टी सभापति शेर बहादुर देउवा पक्षबाट विजयी भएका छन् भने सभापतिमा पराजित शेखर कोइराला पक्षबाट ९ जना विजयी भएका छन् । शनिबारबाट सुरु भएको मतगणना आइतबार सकिएको हो । गत सोमबार सम्पन्न मतदानको निर्वाचन समितिले अहिलेसम्म सभापतिसहित १३ पदाधिकारीको नतिजा सार्वजनिक गरिसकेको छ ।