काठमाडौँ । आज दिउँसो १ बजे प्रतिनिधिसभाको बैठक बस्ने भएको छ । बैठकमा प्रधानमन्त्री शेरबहादुर देउवाले अमेरिकी सहयोग परियोजना मिलेनियम च्यालेञ्ज कर्पोरेसन (एमसीसी) पेश गर्न चाहे पनि रोकिने भएको छ ।

प्रधानमन्त्री देउवाले संसदमा एमसीसी पेश गर्न साझा धारणा बनाउनका लागि सर्वदलीय बैठक बोलाएका थिए । आइतबार बसेको सत्ता गठबन्धन र संसदमा प्रतिनिधित्व गर्ने राजनीतिक दलहरुको सर्वदलीय बैठकमा एमाले सहभागी भएको थिएन ।

बैठकमा सत्ता गठबन्धनकै नेताहरूले एमसीसी संंसदमा पेश गर्नेबारे साझा धारणा बनाउन नसकी टुंगिएको थियो । सत्ता गठबन्धन दलभित्रै एमसीसीबारे के गर्ने भन्ने एजेण्डा बन्न नसक्दा आजको संसद बैठकमा एमसीसी पेश गर्ने सम्भावित कार्यसूचीमा नपर्ने भएको छ ।

त्यसो, त प्रमुख प्रतिपक्षी दल नेकपा एमालेले एमसीसीको विषयमा धारणा बनाइसकेको छैन । पार्टी अध्यक्ष केपी शर्मा ओलीले सत्तारुढ दलको धारणापछि मात्रै आफूहरूले बोल्ने बताउँदै आएका छन् ।

संसद बैठक अवरुद्ध बनाउँदै आएको एमालेले आजको बैठकमा समेत विरोध गर्ने भएको छ । पार्टीले तत्कालीन एमाले नेता माधव नेपालसहित केही सांसदलाई गरेको कारबाहीमा पूर्वाग्रह सोचेको भन्दै सभामुखको राजीनामा माग गर्दै आन्दोलन गरेको हो ।

एमालेले सभामुखले मार्ग प्रसस्त गर्नु पर्ने वा कमजोरी सञ्चाउनु पर्ने अडान राख्दै आएकाले संसद अवरुद्ध भएको हो । एमालेको अवरोधका बीच आज संसद बैठक बस्ने भएको छ ।