काठमाडौं । अघिल्लो साता ओरालो लागेर यो साताको पहिलो दिन उत्साहजनक देखिएको शेयर बजार सोमवार पुनः गिरावट आएको छ ।
आइतबार एक्कासी उकालो चढेको नेप्से सोमवार दोहोरो अंकको गिरावट आएको हो ।

आइतबार १०५.५५ अंकले वृद्धि भएको नेप्से परिसूचक सोमवार १३.४८ अङ्कले घट्दै २८ सय ७२.५ विन्दुमा झरेको नेपाल स्टक एक्सचेन्जले जनाएको छ ।

त्यस्तै, सोमबार सेन्सेटिभ इण्डेक्स ०.०८ अंक घटेको छ भने फ्लोट इण्डेक्स १.५४ अंक र सेन्सेटिभ फ्लोट इण्डेक्स १.२३ अंकले घटेको छ ।
आज कारोबारमा आएका २२५ कम्पनीको १ करोड १ लाख ५ हजार कित्ता शेयर ५ अर्ब १५ करोड ४१ लाख ७७ हजार रुपैयाँ बराबरको खरिदबिक्री भएको छ ।

सोमबार नेप्से परिसूचकसँगै कारोबार रकममा समेत गिरावट आएको छ । आइतबार ६ अर्बभन्दा बढीको शेयर कारोबार भएको थियो ।

सोमबार १३ उपसमूहमध्ये ३ उपसमूहको परिसूचक बढेको छ भने बाँकी ९ उपसमूहको परिसूचकमा गिरावट आएको छ । जसमा लगानी उपसमूहको परिसूचक २.१८ प्रतिशत बढेको छ ।

अन्य उपसमूहको १.२८ प्रतिशत र लघुवित्तको ०.५५ अंक बढेको छ । तर विकास बैंक उपसमूहको परिसूचक भने सबैभन्दा धेरै २.१३ प्रतिशत घटेको छ । बैंकिङ्ग, वित्त, जीवन बीमा र निर्जीवन बीमा उपसमूहको परिसूचक १ प्रतिशतभन्दा बढीले गिरावट आएको छ ।

सोमवार तीन कम्पनीको शेयरमूल्य भने बढेको छ । फरवार्ड माइक्रोफाइनान्स, विन नेपाल लघुवित्त र बुद्धभूमि हाइड्रोपावर कम्पनीको मूल्य १० प्रतिशतले बढेको नेप्सेले जनाएको छ ।

कारोवारका आधारमा भने एचआईडीसीएल, माथिल्लो तामाकोसी, टेलिकम, अरुणभ्याली तथा जीवन विकास लघुवित्त अगाडि देखिएका छन् ।