काठमाडौं । स्थानीय तहको निर्वाचनका सम्बन्धमा नेकपा एमालेको स्थायी समितिले धारणा बनाउने भएको छ ।

सोमबार नेकपा (एमाले)को केन्द्रीय कार्यालय टिमको बैठकपछि सञ्चारकर्मीहरुसँग कुरा गर्दै एमाले सचिव पदमा अर्यालले निर्वाचनबारे स्थायी समिति बैठकले धारणा बनाउने बताइन् ।

बुधबार एमाले स्थायी समितिको बैठक बस्दैछ । उक्त बैठकमा निर्वाचनकाबारेमा छलफल हुने सचिव अर्यालले बताइन् ।

एमालेले स्थानीय तहको निर्वाचन वैशाखमै हुनुपर्नेमा जोड दिँदै आएको भन्दै अर्यालले स्थायी समिति बैठकले पनि निर्वाचन गर्न दबाब दिनेबारे निर्णय लिने बताइन् ।

एमालेले बैशाखमा स्थानीय तहको निर्वाचन हुुनुपर्ने भन्दै निर्वाचनको मिति छिटो घोषणा गर्न सरकारलाई दबाब दिँदै आएको छ ।
एमाले स्थायी समिति बैठकमा एमसीसी परियोजनाकाबारेमा पनि छलफल गर्ने बताइएको छ ।

एमसीसीको विषयमा सरकारले छलफल अगाडि बढाउन खोजेको भएपनि संसदमा दर्ता हुने नहुने एकिन नभएको एमाले सचिव अर्यालले बताइन् ।

एमसीसी संसदमा दर्ता भएको अवस्थामा मात्रै एमालेले आफ्नो धारणा स्पष्ट पार्ने उनको भनाइ थियो ।

पार्टी महासचिव शंकर पोखरेलको अध्यक्षतामा सोमवार बसेको केन्द्रीय कार्यालयको बैठकले पार्टीको जिल्ला अधिवेशन र भर्खरै सम्पन्न भएको राष्ट्रियसभा निर्वाचनको सम्बन्धमा समीक्षा गरेको सचिव अर्यालले जानकारी दिइन् ।