काठमाडौं । नेकपा एमालेले यही २३ गते देशभर एक साथ जिल्ला अधिवेशनहरू गर्ने भएको छ । ७७ वटै जिल्ला अधिवेशन गर्न केन्द्रले निर्देशन दिएपछि जिल्ला अधिवेशनको सबै पूरा तयारी भइसकेको एमालेले जनाएको छ ।

अधिवेशनका लागि सबै वडाबाट प्रतिनीधि छान्ने र जिल्लाको व्यवस्थापनको तयारी समेत सकेको एमाले केन्द्रमा रिपोटिङ आएको प्रचार विभागका उपप्रमुख विष्णु रिजालले जानकारी दिएका छन् ।

एमालेमा सकेसम्म सर्वसम्मत नेतृत्व चयनका लागि पहल गर्न निर्देशन दिएको छ । सहमति हुन नसकेको अवस्थामा निर्वाचनको विविध अवलम्बन गर्न एमालेले मातहत कमिटीहरूलाई खुला छाडेको छ ।

पुस २३ गते हुने जिल्ला अधिवेशन तथा माघ ८ मा हुने प्रदेश अधिवेशका लागि केन्द्रीय कार्यालयको तर्फबाट पठाइएको लिखित मापदण्ड अनुसार निर्वाचनको प्रक्रियामा पार्टीको केन्द्रीय निर्वाचन आयोगको निर्देशन अवलम्बन गर्न भनिएको छ ।
जिल्ला तथा प्रदेश अधिवेशनका लागि दशौं राष्ट्रिय महाधिवेशनको लागि निर्धारण गरिएका पार्टी सदस्यलाई नै आधार बनाउन एमालेले सर्कुलर गरेको छ ।

मौसमका कारण कतिपय हिमाली जिल्लामा अधिवेशन गर्न असम्भव भएमा केन्द्रीय कार्यालयसँगको परामर्शमा अर्को मिति तोक्न सकिने एमालेले जनाएको छ । मनाङ, मुस्ताङ, डोल्पा, हुम्लासहित केही जिल्लामा भने केन्द्रीय कार्यालयको परामर्शमा अधिवेशन हुनेछ । अन्य जिल्लाहरुमा २३ गते नै जिल्ला अधिवेशन तयारी भइरहेको छ ।

दशौं महाधिवेशनपछि जिम्मेवारी पाएका केन्द्रीय सदस्यहरु अहिले जिल्ला अधिवेशनको तयारीमा जिल्ला जिल्लामै रहेका छन् । उनीहरुकै निर्दैशनमा जिल्ला अध्यक्ष र जिल्ला कमिटीहरुले काम गरिरहेको एमालेले जनाएको छ ।

एमालेको जिल्ला अधिवेशन सकिएको लगत्तै सात वटै प्रदेश सम्पर्क कमिटीहरुको अधिवेशन हुने भएको छ । सो अधिवेशनबाट पनि नयाँ नेतृत्व चयन हुने एमालेले जनाएको छ । पौष ३० गते प्रदेश सम्पर्क कमिटीको अधिवेशन हुने एमालले जनाएको छ ।

त्यसैगरी माघ ८ गते प्रदेश संगठन कमिटीको अधिवेशन हुने भएको छ । पौष २३ गते जिल्ला अधिवेशन सकिए लगत्तै प्रदेश सम्पर्क कमिटी र प्रदेश संगठन कमिटीको अधिवेशनको तयारी थाल्ने एमालेले जनाएको छ । यससँगै एमालेले त्यसमुनिका कमिटीहरुको पनि अधिवेशन तीब्र रुपमा थालेको छ ।

माघ २२ गते सम्पर्क मञ्चहरुको सम्मेलन तथा त्यही क्रममा जनवर्गीय संगठनहरुको सम्मेलन गर्ने पनि तयारी गरेको छ । अहिले देशभर पत्रकारहरुको संगठन प्रेस चौतारी नेपालले देशभर अधिवेशन गरिरहेको छ । एमालेको पत्रकारहरको संगठन प्रेस चौतारीले पनि माघमै सम्मेलन गर्ने तयारी गरेको छ ।