काठमाडौं । मानसिक अस्पताल पाटनको निर्देशकको जिम्मेवारी डा.अनन्त अधिकारीले पाएका छन् । आइतबार स्वास्थ्य मन्त्री विरोध खतिवडाले मन्त्रीस्तरीय निर्णय गर्दै डा. अधिकारीलाई निर्देशकको जिम्मेवारी दिएका हुन् ।

डा. अधिकारी प्रमुख कन्सलट्यान्ट साइक्याटिक्स (एघारौं तह) का चिकित्सक हुन् । केन्द्रीय मानसिक अस्पतालका रूपमा वर्गीकरण गरिएको मानसिक रोग अस्पताल पाटन हाल ५० बेडमा सञ्चालन भइरहेको छ ।

‘बिरामीको चाप बढी छ, अहिलेको भौतिक संरचनालाई सुधार गरेर एक सय बेड बनाउने योजना छ ‘, अधिकारीले भने । यसअघिका निर्देशक डा. मोहनराज श्रेष्ठको तीन साता अघि अवकाश पाएका थिए ।