नवलपुर । नवलपरासीपूर्वको देवचुली नगरपालिकामा रहेको प्रगतिनगर खानेपानी तथा सरसफाई उपभोक्ता संस्थामा भएको निर्वाचनमा नेकपा एमाले एक्लैले सत्ता गठबन्धनलाई पराजित गरेको छ ।

खानेपानी संस्थाको आठौं अधिवेशन अन्तर्गत भएको निर्वाचनमा नेकपा एमालेका उम्मेदवार खिमानन्द भुसालले गठबन्धनको प्यानललाई पराजित गरेका हुन् ।

खानेपानी संस्थाको निर्वाचनमा सहमतिको प्रयास असफल भएपछि एमाले एक्लै र गठबन्धनले संयुक्त प्यानल बनाएर चुनाव लडेका थिए ।

एमालेका तर्फबाट अध्यक्षका उम्मेदवार भुसालले नेपाली काङ्ग्रेस, नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टीको संयुक्त गठबन्धनका उम्मेदवार नारायणप्रसाद पौडेललाई पराजित गरे ।

एमालेका उम्मेदवार भुसालले गठबन्धनलाई ५ सय ५९ मतको फराकिलो अन्तरले हराएका छन् । भुसालले २ हजार ४ मत प्राप्त गर्दा पौडेलले १ हजार ४ सय ४५ मत प्राप्त गरे ।

सचिव पदमा भने संयुक्त गठबन्धनका इन्द्रमणि भुसालले जितेका छन् । उनले कुल १ हजार ६ सय ९९ मत ल्याई सूर्यप्रसाद न्यौपानेलाई २१ मतान्तरले पराजित गरे ।

लेखा समिति संयोजकमा रत्ना भुसाल १ हजार ८ सय ६ मतका साथ बिजयी भइन । उनका प्रतिद्वन्द्वी गठबन्धनका लिलाधर अधिकारीले १ हजार ५ सय ५३ मत ल्याए ।

प्रगतिनगर खानेपानीमा देवचुली नगरपालिकाको १० देखि १५ सम्मका ६ वटा वडाका नौ वटा ब्लक समेटिएको छ ।

निर्वाचनमा ३ हजार ५ सय ४९ मत खसेकोमा एमालेले २, ४, ५, ७, ८ र ९ वटा ब्लकमा जित हात पारेको छ ।

अध्यक्ष, सचिव, लेखा समिति संयोजक र दुई सदस्य तथा नौ वटा ब्लक सदस्यसहित १४ पदमा भएको निर्वाचनमा एमालेले अध्यक्ष र लेखासमिति संयोजकसहित १० पदमा जित निकाल्दा गठबन्धनले सचिवसहित १, ३ र ६ नम्बर ब्लक गरी ४ पदमा मात्रै जित हात पारेको छ ।

निर्वाचन समितिका संयोजक जीवलाल श्रेष्ठकाअनुसार खानेपानी संस्थाको निर्वाचनमा कुल ३ हजार ५ सय ४९ अर्थात् ७०.३२ प्रतिशत मत खसेको थियो ।