काठमाडौं । प्रधानमन्त्री एवम् नेपाली कांग्रेसका सभापति शेरबहादुर देउवा पत्नी डा.आरजु राणा पार्टीमा मात्रै संलग्न छैनन् । उनको संलग्नता सामाजिक संघसंस्थादेखि एनजीओ आएनजीओसम्म छ ।

एनजीओ आइएनजीओदेखि विभिन्न ब्यापारिक घरानासम्म नै आरजुको संलग्नता रहेको समाचारहरु सार्वजनिक भएपछि उनले आफ्नो संलग्नता ब्यापारिक समूहहरुसँग नभएको प्रष्टीकरण दिएकी छन् ।

नेपाली कांग्रेसको केन्द्रीय सदस्यसमेत रहेकी राणाले आफ्नो संलग्नता रहेको संस्थाहरुको बारेमा सार्वजनिक गरेकी छन् ।

राणाले सामाजिक संघसंस्थादेखि एनजीओहरुमा संलग्न रहेको स्वीकार गरेकी छन् । आफ्नो संलग्नता रहेको संस्था र आफ्नो जिम्मेवारीबारे पनि राणाले सामाजिक सञ्जाल फेसबुकबाट सार्वजनिक गरेकी छन् । उनले आफ्नो संलग्नता विभिन्न ६ वटा संस्थामा रहेको बताएकी छन् ।

कांग्रेस नेतृ एवम् देउवा पत्नी राणा सुरक्षित मातृत्व सञ्जाल महासंघको अध्यक्ष छिन् । उक्त संस्थाको संस्थापक रहेकी राणा महासंघको वर्तमान अध्यक्ष हुन् । नेतृ राणा नामी संस्थाको पनि अध्यक्ष छिन् ।

कांग्रेस नेतृ राणा ग्रामीण महिला विकास तथा एकता केन्द्र रुडुक नेपालको संस्थापक अध्यक्ष तथा सल्लाकार रहेको बताएकी छन् ।

यस्तै, आफू साथी नेपालको पनि संस्थापक, पूर्व अध्यक्ष तथा सल्लाहकार रहेको पनि राणाले स्पष्ट गरेकी छन् । राणाले विभिन्न सामाजिक संस्थामा पनि आफ्नो संलग्नता रहेको बताएकी छन् । ब्लड डोनर एशोशिएसन नेपालको संरक्षक रहेकी राणा उल्लेन्स स्कुलको विद्यालय ब्यवस्थापन समिति अध्यक्ष छिन् ।