काठमाडौं । राजधानीमा जारी सहिद स्मारक ए डिभिजन लिग अन्तर्गत शुक्रबार भएको दोस्रो खेलमा एपिएफ र जावलाखेल युथ क्लबले बराबरी खेल्दै अंक बाँडेका छन ।

विभागीय फुटबल क्लब एपिएफ र जावलाखेल युथ क्लबले गोलरहित बराबरी खेल्दै अंक बाँडेका हुन् । दुवै टोलीले गोलरहित बराबरीमा खेलेर अंक बाँड्दै आठौं चरणको आफ्नो खेल सकाएका छन् ।

बराबरीपछि एपीएफले ८ खेलमा ७ अंक जोडेको छ । एपीएफ दशौँ स्थानमा यथावत रहँदा जावलाखेलले ८ खेलमा ८ अंक जोडेको छ । जावलाखेल नवौं स्थानमा यथावत छ ।

यसअघि शुक्रबार भएको पहिलो खेलमा उपाधि होडमा रहेको अपराजित टोली संकटाले शुक्रबार त्रिपुरेश्वरस्थित दशरथ रंगशालामा नवप्रवेश सातदोबाटो युथ क्लबसँग बराबरी खेलेको छ ।

बराबरीसँगै संकटाले जारी सिजन ८ खेलमा पाँचौ बराबरी खेलेको छ । बराबरीपछि संकटा अपराजित रहँदै १४ अंकका साथ तेस्रो स्थानमा कायम रहेको छ । सातदोबाटोले पनि संकटासँग एक अंक खोस्दै ९ अंक बनाएर आठौं स्थानमा कायम रहेको छ ।

लिगमा शनिबार तीन खेल हुँदैछन् । दशरथ रंगशालामा हुने दिनको पहिलो खेल साविक विजेता मच्छिन्द्र फुटबल क्लब र फ्रेन्ड्स फुटबल क्लबबीच हुनेछ भने दोस्रो खेल न्यूरोड टिम (एनआरटी) र त्रिभुवन आर्मी फुटबल क्लबबीच हुनेछ । पोखरा रंगशालामा घरेलु टोली मनाङले च्यासल युथ क्लबको सामना गर्नेछ ।