काठमाडौँ । प्रदेश–२ का क्यान्सर पीडितलाई प्रदेश सरकारले मासिक भत्ता उपलब्ध गराउने भएको छ । मुख्यमन्त्री लालबाबु राउतले मासिक भत्ता दिनेबारे तयारी भएको बताएका हुन् ।

नेपाल अर्बुद रोग निवारण संस्थाको ३१ औँ केन्द्रीय सभा सिरहाको लहानमा हिजो उद्घाटन गर्दै मुख्यमन्त्री राउतले प्रदेश सरकारले क्यान्सर पीडितको उपचारार्थ कानुन बनाएर मासिक भत्ता दिने बताएका हुन् । “क्यान्सर पीडितले पहिलादेखि नै उपचारका लागि एक लाख राहत पाउँदै आएका छन्”, मुख्यमन्त्री राउले भने, “अब प्रदेश सरकारले कानून बनाएर मासिक भत्ता दिन लागेको छ ।”

उनले लहानमा स्थापना हुन लागेको क्यान्सर अस्पताललाई प्रदेश सरकारले आवश्यक सहयोग गर्ने प्रतिबद्धता व्यक्त गरे । स्वास्थ्य अवस्थामा सुधार ल्याउन प्रदेश सरकारले मधेस स्वास्थ्य विज्ञान प्रतिष्ठानको स्थापना गरेको उल्लेख गदर्लै उनले प्रदेश सरकारले स्थापना गरेको प्रादेशिक जनस्वास्थ्य प्रयोगशाला देशकै नमूना हुने बताए ।