काठमाडौँ । भरतपुर महानगरकी मेयर रेणु दाहालले गौतमबुद्ध अन्तर्राष्ट्रिय क्रिकेट रंगशालाको स्वामित्व भरतपुर महानगरपालिकाले लिने बताएकी छन् । उनले धुर्मुस–सुन्तली फाउण्डेशनले दिएको आर्थिक र प्राविधिक प्रतिवेदनको सरकारी पक्षबाट मूल्यांकन गरिसकेपछि रंगशालाको स्वामित्व लिने बताएकी हुन् ।

आइतबार न्यूज एजेन्सी नेपालसँग कुरा गर्दै मेयर दहालले धुर्मुस–सुन्तली फाउण्डेशनले आफूलाई १७ करोड ऋण लागिसकेको र राष्ट्रिय तथा अन्तर्राष्ट्रिय स्तरबाट सोचेअनुरुप सहयोग प्राप्त नभएकाले महानगरलाई स्वामित्व लिन आग्रह गरेको बताउँदै आएकाले बाँकी काम महानगरले गर्ने बताएकी हुन् । उनले सरकार यस प्रकारको जिम्मेवारीबाट पन्छिन नमिल्ने बताइन् ।

‘हामीले प्रक्रिया अघि बढाइसकेका छौँ, यसअघि पनि लगभग १० करोड बजेट महानगरको आन्तरिक बजेटबाट उपलब्ध गराएको हो, महायज्ञ धनधान्याञ्चल आयोजना गरेर पनि सहयोग गरेका हौँ, १८–२० करोडको बजेट फाउण्डेशनलाई उपलब्ध गराएको हो, उहाँहरुले १७ करोड ऋण लागिसक्यो गर्न सक्ने स्थिति भएन भनेपछि ऋण लगाएर गर्ने कुरा भएन,’ उनले भनिन् ।

‘उहाँहरुले हामीले श्रोत जुटाउन सकेनौँ, त्यसकारण महानगरले स्वामित्व ग्रहण गरिदिनुपर्छ भनेर आग्रह गरेपछि हामीलाई पत्र पनि दिनु भयो, र उहाँहरुले फाउण्डेशनको तर्फबाट आर्थिक र प्राविधिक प्रतिवेदन पेश गरेपछि यो बहुवर्षीय योजनाअनुसार अघि बढाउन र ऋण तिर्न पनि संघीय सरकारलाई आग्रह गर्छौं,’ उनले थपिन् । उनले सरकारले जिम्मेवारीबाट पन्छिन नमिल्न बताउँदै यो आयोजना सम्पन्न गर्ने बताइन् ।