काठमाडौँ । स्वास्थ्य कार्यालय काठमाडौँले १२ देखि १७ वर्ष उमेर समूहका बालबालिकालाई भोलि (मंगलबार)देखि कोरोना भाइरस (कोभिड–१९)विरुद्धको खोप फाइजर दिने जनाएको छ ।

स्वास्थ्य कार्यालय काठमाडौँका प्रमुख शम्भु काफ्लेले स्थानीय पालिकाहरँसँग समन्वयमा भोलिदेखि फाइजर खोप दिने निर्णय गरिएको जानकारी दिए । उनका अनुसार काठमाडौँका सबै स्कुल अर्थात जहाँ दुई सय विद्यार्थी रहेका छन् । सोही स्कुललाई केन्द्र राखेर खोप दिइन्छ ।

यदि, दुई सयभन्दा कम विद्यार्थी रहेमा अन्य स्कुलमा पायक पर्ने गरी खोप दिइने उनले जानकारी दिए । कुन स्कुलमा कति गते खोप अभियान सञ्चालन गर्ने स्थानीय तहले निर्धारण गर्ने समेत उनले जानकारी दिए । उनले यो खोप अभियान एक सातासम्म चल्ने बताए ।

कार्यालय प्रमुख काफ्लेले भने, ‘काठमाडौँमा दुई लाख ७० हजार बालबालिका रहेको अनुमान गरिएको छ, त्यसका लागि आवश्यक स्वास्थ्य सामाग्री पठाइसकेका छौँ ।’

पहिलो मात्रा फाइजर खोप लगाएकाको दोस्रो मात्रा माघ २४ गते दिइने छ । उनले खोप लिनका लागि परिचय पत्र लिएर जानु पर्ने बताए ।

उपत्यकाको अर्को जिल्ला भक्तपुरमा भने सोही उमेर समूहका बालबालिकालाई गत शुक्रबारदेखि नै मोडर्ना खोप दिइएको छ ।