काठमाडौँ । पछिल्लो समय देशभर कोरोना भाइरस (कोभिड–१९)को संक्रमण बढेसँगै सार्वजनिक स्थलमा राजनीतिक, प्रशासनिक तथा सामाजिक कार्यक्रम नगर्न गृह मन्त्रालयले अनुरोध गरेको छ । कोरोना भाइरस रोकथाम तथा नियन्त्रण सरकारले आजदेखि लागु हुने गरी सार्वजनिक स्थलमा भेला हुन प्रतिबन्ध गरेको हो ।

मन्त्रालयले एक विज्ञप्ति जारी गर्दै सार्वजनिक स्थलमा बढीमा २५ जनाभन्दा बढी भेला हुन नपाउने जनाएको छ । यस्तै, जिल्ला तथा स्थानीय तहले आफ्नो सीमा क्षेत्रको निगरानी गरी सुरक्षामा कडाई गर्न पाउने (लक डाउन) व्यवस्थासमेत गरेको छ ।

यस्तै, सार्वजनिक स्थानहरू होटल, रेष्टुरेण्ट, सिनेमा हललगायत क्षेत्रहरूमा प्रवेश गर्दा अनिवार्य रुपमा कोभिडविरुद्ध लगाएको खोप कार्ड देखाउनु पर्ने भएको छ । यदि, कसैसँग खोप कार्ड नभएको अवस्थामा मोबाइलबाट फोटोसमेत देखाउन सक्ने विज्ञप्तिमा उल्लेख गरेको छ ।