काठमाडौँ । काठमाडौँ उपत्यकाका विद्यालय उमेर समूहका बालबालिकालाई आजदेखि कोरोना भाइरस (कोभिड–१९) विरुद्धको खोप लगाइँदै छ ।

स्वास्थ्य तथा जनसंख्या मन्त्रालयका अनुसार काठमाडौं, ललितपुर र भक्तपुरका १२ देखि १७ वर्ष उमेरका बालबालिकालाई विद्यालयमा खोप लगाइने भएको हो ।

सरकारले आजबाटै लागू हुने गरी आधारभूत र माध्यमिक तहका विद्यालय १५ माघसम्मका लागि बन्द गरिसकेको छ । यही अवधिमा उमेर समूहका बालबालिकालाई खोप लगाउने सरकारी लक्ष्य छ ।

जसअनुसार पहिलो चरणमा उपत्यकाका विद्यालयमा खोप अभियान सुरु हुन लागेको हो ।

बालबालिकालाई फाइजर र मोडर्ना खोप लगाइने मन्त्रालयले जनाएको छ । खोप लगाउन बालबालिकालाई उमेर खुल्ने कागजात लिई तोकिएका खोप केन्द्रमा जान मन्त्रालयले आग्रह गरेको छ ।