काठमाडौँ । कर्तव्य ज्यान मुद्दामा १७ वर्षदेखि फरार उदयपुरको बेलका नगरपालिका ६ का ४० वर्षीय गोविन्द मगरलाई पक्राउ गरिएको छ । उनलाई साउदी अरेबियामा पक्राउ गरी स्वदेश ल्याइएको हो ।

इन्टरपोलद्वारा ‘रेड नोटिस’ जारी भएका फरार मगरलाई साउदी अरेबियामा पक्राउ गरिएपछि प्रहरी प्रधान कार्यालय इन्टरपोल शाखाको समन्वयमा परिचालन भएको प्रहरी टोलीले बुधबार नेपाल ल्याएको हो ।

प्रतिवादी मगरले २०६१ मंसिर १३ गते मानबहादुर तामाङको हत्या गरेका थिए । सोही मुद्दामा जिल्ला अदालत उदयपुरबाट पक्राउ अनुमति प्राप्त भई इलाका प्रहरी कार्यालय रामपुर ठोक्सिलाको अनुरोधमा प्रहरी प्रधान कार्यालय इन्टरपोल शाखाले इन्टरपोल महासचिवालयसँगको सहयोगमा खोजतलास गरेको थियो ।

प्रतिवादी मगरलाई आवश्यक कानुनी कारबाहीका लागि उदयपुरको इलाका प्रहरी कार्यालय, रामपुर ठोक्सिलालाई आज बुझाइएको प्रहरी प्रधान कार्यालयले जनाएको छ ।