काठमाडौं । स्वास्थ्यकर्मीहरु नै कोरोना संक्रमित हुन थालेपछि देशका अधिकांश अस्पतालका सेवाहरु बन्द हुन थालेका छन् ।

काठमाडौंको टेकु अस्पतालमा ५० भन्दा बढी स्वास्थ्यकर्मी संक्रमित भएका छन् । टेकु अस्पतालले सोमवारदेखि सेवा बन्द गर्ने सूचना निकालिसकेको छ छ ।

जिल्लास्थित अस्पतालहरु पनि स्वास्थ्यकर्मीहरु नै संक्रमित भएको भन्दै धमाधम बन्द हुन थालेका छन् ।

हुम्ला जिल्ला अस्पताल पनि अर्को सूचना नभएसम्मका लागि भन्दै बन्द गरिएको छ ।

हुम्ला अस्पतालका आठ जना स्वास्थ्यकर्मीलाई कोरोना संक्रमण देखिएपछि आकस्मिकबाहेक अन्य सबै सेवा बन्द गरेको हो ।

जिल्ला अस्पताल हुम्लाले गएको शुक्रबार एकैपटक गरिएको परिक्षणमा अस्पताल हुम्लाका आठजना स्वास्थ्यकर्मीलाई कोरोना संक्रमण पुष्टि भएपछि आइतबारदेखि अर्को सूचना जारी नभएसम्मका लागि अन्य सेवा बन्द गरिएको अस्पतालले जनाएको हो ।

स्वास्थ्यकर्मीलाई संक्रमण देखिन थालेपछि जिल्लामा संक्रमणको जोखिम बढेको अनुमान गरेर अस्पताल प्रशासनले सूचना टाँस गरेर सम्पूर्ण सेवा बन्द गरिएको अस्पतालका सिनियर अनमी सरिता बोहराले बताइन् ।

जिल्ला स्वास्थ सुरक्षा समितीको बैठकको निर्णयअनुसार जिल्ला अस्पताल हुम्लामा आकस्मिकबाहेक अस्पतालबाट प्रदान हुने सबै प्रकारका सेवा बन्द गरिएको स्वास्थ्य कार्यालय हुम्लाका प्रमुख प्रेमबहादुर सिंहले बताए ।