काठमाडौं । राष्ट्रिय जनगणना-२०७८ को पारम्भिक नतिजा आज सार्वजनिक हुँदैछ । केन्द्रीय तथ्यांक विभागले जनगणनाको प्रारम्भिक नतिजा आज सार्वजनिक गर्ने तयारी गरेको छ ।

प्रारम्भिक नतिजामा लिंगको आधारमा महिला र पुरुषको मात्र संख्या सार्वजनिक गरिनेछ । तर, अन्य लैंगिक र यौनिक पहिचान भएकाहरुको विवरण भने पछि सार्वजनिक गर्ने विभागले जनाएको छ ।

गणकले भरेका मुख्य प्रश्नावलीमा उल्लिखित विवरणका आधारमा प्रारम्भिक नतिजा सार्वजनिक गर्न लागिएको विभागले जनाएको छ । प्रारम्भिक नतिजामा नेपालमा जम्मा परिवार संख्या, महिला र पुरुषसहित जम्मा जनसंख्या र विदेशमा रहेका नेपालीको जनसंख्या सार्वजनिक गरिने भएको छ ।

अहिले मात्र पारम्भिक र ६ महिनाभित्र विस्तृत नतिजा सार्वजनिक गर्ने तयारीमा तथ्यांक विभाग छ । अन्तिम नतिजा भने सार्वजनिक हुन करिव नौ महिना लाग्ने अनुमान विभागले गरेको छ ।

गत भदौ ३० गतेदेखि असोज १८ सम्म घर तथा घर–परिवारको सूचीकरण गरिएको थियो भने कात्तिक २५ देखि मंसिर ९ गतेसम्म मुख्य जनगणनाको काम विभागले गरेको थियो । नेपालमा प्रत्येक १० वर्षमा जनगणना गर्ने काम भइरहेको छ ।