काठमाडौं । कोभिड १९ संकट ब्यवस्थापन केन्द्रले सार्वजनिक सवारीमा जोर बिजोर हटाउन सिफारिस गरेको छ ।

काठमाडौं उपत्यकामा माघ ८ गदेदेखि जोरबिजोर प्रणालीबाट यातायात सञ्चालन गर्न उपत्यकाका तीन वटै सिडियो कार्यालयले निर्देशन दिएपछि त्यसको चौतर्फी आलोचना भएको छ ।

जोर बिजोरले सार्वजनिक सवारीमा झनै भिड बढेको र यसले कोरोना नियन्त्रण गर्न सहयोग नपुर्याएको भन्दै आलोचना भएपछि सीसीएमसीले सार्वजनिक सवारीमा जोर बिजोर हटाउन सिफारिस गरेको हो ।

सीसीएमसीले निजी सवारी र ट्याक्सीमा भने जोर बिजोर कायमै राख्न सिफारिस गरेको छ ।

माघ मसान्तसम्म विद्यालय बन्द गर्न सिफारिस

सीसीएमसीले आगामी माघ मसान्तसम्म विद्यालय बन्द गर्न पनि सिफारिस गरेको छ ।

भर्चुअल माध्यममार्फत पठनपाठन गर्न दिने गरी सीसीएमसीले सिफारिस गरेको छ ।

यसअघि सरकारले माघ १५ गतेसम्म विद्यालयमा भौतिक उपस्थितिमा पठनपाठन गर्न रोक लगाएको छ । माघ १५ देखि २० गतेसम्म खोप प्रयोजनका लागि विद्यालय खुला गर्ने सरकारले निर्णय गरिसकेको छ ।