काठमाडौँ । काठमाडौं उपत्यकामा सार्वजनिक यातायातमा जोरबिजोर प्रणाली हटेको छ । सार्वजनिक यातायातका सवारी साधनमा जोरबिजोर हटाए पनि निजी सवारी साधन र ट्याक्सीमा भने जोर बिजोर प्रणाली कायमै राखिएको छ ।

उपत्यकाका तीन वटै प्रमुख जिल्ला अधिकारी (सीडीओ)ले शनिबारदेखि लागू हुने गरी नयाँ आदेश जारी गरेका हुन् । कोरोना भाइरस (कोभिड–१९) महामारी नियन्त्रण र रोकथामका लागि भन्दै स्मार्ट लकडाउन सम्बन्धी कार्य विधिअनुसार प्रशासनले नयाँ आदेश जारी गरेको छ । विश्व विद्यालय, विद्यालयमा भौतिक उपस्थितिमा पठनपाठन नगर्ने आदेशलाई माघ मसान्तसम्म लम्ब्याइएको छ ।

कोरोना संक्रमणदर बढेको भन्दै ७ माघदेखि उपत्यकामा अत्यावश्यक सेवाबाहेकका सवारी साधनमा जोर बिजोर कायम गरिएको थियो । पुस अन्तिम साताबाट बन्द विद्यालय, कलेज, विश्व विद्यालय र शैक्षिक प्रतिष्ठान माघ मसान्तसम्म खुल्ने छैनन् ।

यसअघि १५ माघसम्मका लागि भौतिक उपस्थितिमा पठनपाठन बन्द गरिएकोमा कोभिड–१९ संकट व्यवस्थापन समन्वय केन्द्र (सिसिएमसिसी)को सिफारिसमा माघ मसान्तसम्मका लागि रोक लगाइएको हो ।