जनकपुरधाम । किसान आन्दोलनको अगुवाई गर्दै आएको सीके राउत नेतृत्वको जनमत पार्टीले शनिवार धनुषासहित मधेसका जिल्लाहरुमा ‘साङ्लो’ जुलुस निकालेको छ ।

विभिन्न ११ बुँदे माग राखी किसान आन्दोलन गर्दै आएका जनमत पार्टीका कार्यकर्ताले शनिवार आफ्नै हातमा साङलो बाँधेर प्रदर्शन गरेका हुन् ।

किसानका लागि पेन्सन, बालीनालीको स्वतः बिमा, कृषि मिटरको बिजुली निःशुल्क, मलखाद र बीउबिजनको व्यवस्था, बाली क्षतिपूर्तिवापत् राहत, कृषि उत्पादनको उचित समर्थन मूल्य निर्धारण, उखु किसानको भुक्तानी लगायतको माग राख्दै जनमत पार्टी आन्दोलनमा छ ।

जनमत पार्टीले जनकपुरमा माघ १२ गतेको राष्ट्रियसभा निर्वाचनसमेत विथोल्ने प्रयास गरेको थियो । किसानको माग सम्बोधन नगरी भोट हाल्न नदिने भन्दै जनप्रतिनिधिहरु चढेको गाडी तोडफोडसमेत गरेका थिए ।

सो क्रममा जनमत पार्टीका कार्यकर्ताहरु पक्राउ परेका छन् । पक्राउ परेका आफ्ना कार्यकर्तालाई छुटाउन जनमत पार्टीले प्रदर्शन जारी राखेको छ ।