काठमाडौं । एमसीसी नेपाल कम्प्याक्ट सम्बन्धि गोप्य वा लुकाइएका दस्तावेजहरु प्राप्त भएको भन्ने समाचार प्रमाशित भएपछि एमसीए नेपालले आफ्नो ध्यानाकर्षण भएको जनाएको छ ।

एमसीए नेपालले मंगलबार विज्ञप्ति जारी गर्दै एमसीसी नेपाल सम्झौता सम्बन्धि कुनै पनि दस्तावेज गोप्य नभएको जनाएको छ ।

‘एमसीए नेपाल नेपाल सरकारको जिम्मेवार निकाय भएको र एमसीसी नेपाल कम्प्याक्ट नेपालको आर्थिक हितका लागि नेपाल सरकारबाट कार्यान्वयन गर्न लागिएको सम्झौता भएकाले यस सम्बन्धि कुनै पनि दस्तावेज गोप्य राखिनु वा लुकाउनु एमसीए–नेपालको पारदर्शिताप्रतिको प्रतिवद्धता विपरित हुन्छ ।’– विज्ञप्तिमा भनिएको छ ।

साथै गोप्य भनिएका कुनै पनि दस्तावेज एमसीसीसँग गरिएका सम्झौता नभएको पनि एमसीए नेपालले जनाएको छ ।

एमसीए नेपालले सार्वजनिक महत्वका सम्पूर्ण दस्तावेजहरु आफ्ना वेवसाइट तथा अन्य माध्यामबाट सर्वसाधारणको जानकारीका लागि सार्वजनिक गर्दै आएको पनि दावी गरेको छ ।