काठमाडौं । युवा तथा खेलकुद मन्त्री महेश्वरजंग गहतराजले नेपाली राष्ट्रिय फुटबल टिमका खेलाडीहरुलाई बधाई दिएका छन् ।

अफ्रिकी देश मौरिसससँगको मैत्रीपूर्ण खेलमा जित हासिल गरेको नेपाली टिमलाई मन्त्री गहतराजले बधाई दिएका हुन् । मन्त्री गहतराजले नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीको समेत प्रशंसा गरे ।

दशरथ रंगशालामा मंगलबार बेलुका र शनिवार भएको दुवै खेलमा नेपाल १–०ले विजयी भएको थियो ।

अफ्रिकन देशसँग पहिलो पटक भएका दुबै मैत्रीपूर्ण खेल हेर्न मन्त्री गहतराज स्वयं रंगशालामा उपस्थित भएका थिए ।

खेलकूदमन्त्री स्वयं उपस्थित मंगलबारको दोस्रो मैत्रीपूर्ण खेल भने निकै तनावपूर्ण बनेको थियो । खेलमा दुवै टिम खेल अनुशासन विपरित आपसमा जुध्न तम्सिएका थिए ।

खेलमा फउल गरेर आपसमा लड्न लागेपछि मौरिसका दुई खेलाडी र नेपालका एक खेलाडीले रातोकार्ड पाएका थिए ।