काठमाडौं । नेकपा एमालेले स्थानीय तहको निर्वाचनको तयारीमा जुट्न आफ्नो नेता तथा कार्यकर्तालाई निर्देशन दिएको छ ।

एमालेको बुधबार बसेको केन्द्रीय सचिवालयको बैठकले स्थानीय तहको निर्वाचनको तयारीमा जुट्न निर्देशन दिएको हो ।

प्रधानमन्त्री शेरबहादुर देउवा र निर्वाचन आयोगका पदाधिकारीबीच ४ जेठमा स्थानीय तहको निर्वाचन गर्ने सहमति भएपछि बसेको एमालेको बैठकले निर्वाचनको तयारीमा जुट्न निर्देशन दिएको हो ।

बैठकले प्रदेश अधिवेशनहरू स्थानीय निर्वाचनपछि गर्ने र जिल्ला अधिवेशनहरू निर्वाचनअघि नै गर्ने निर्णय गरेको छ ।

स्थानीय निर्वाचनमा केन्द्रित भई केन्द्रीय र प्रदेशस्तरमा अगुवा कार्यकर्ता भेला आयोजना गर्ने, युवा, विद्यार्थी, महिला र किसानबाहेकका जनसंगठनका राष्ट्रिय अधिवेशनहरू तोकिएकै मितिमा गर्ने निर्णय भएको छ ।

पार्टीको नियमावली र जनसंगठन सञ्चालन निर्देशिका सुझावसहित पारित गरेको छ ।

बैठकले केन्द्रीय प्रचार तथा प्रकाशन, उद्योग, वाणिज्य तथा आपूर्ति विभाग, पार्टी स्कुल विभाग, सहकारी तथा गरिबी निवारण विभाग र स्थानीय तह विभागमा सदस्यहरू मनोनयन गरेको छ ।

भोलिसम्म स्थानीय निर्वाचनको मिति तोक्न एमालेको अल्टिमेटम

बुधबार बसेको एमाले केन्द्रीय सचिवालय बैठकले विहीबारसम्म स्थानीय तहको निर्वाचनको मिति तोक्न सरकारलाई अल्टिमेटम दिएको छ ।

बैठकले स्थानीय तहको निर्वाचन मिति विहीबार नतोके सरकारविरुद्ध केन्द्रसहित सातवटै प्रदेशमा दवाबमुलक कार्यक्रम सञ्चालन गर्ने निर्णय गरेको हो ।

एमालेका जनवर्गिय संगठनहरुले स्थानीय तहको निर्वाचनको मिति घोषणा गर्न दबाब दिँदै आएका छन् ।

त्यस्तै, एमाले सचिवालय बैठकले राष्ट्रियसभा सदस्य निर्वाचनमा क्रस भोटिङ गरेका प्रतिनिधिलाई कारबाही गर्न पनि प्रदेश कमिटीलाई निर्देशन दिएको छ ।

बैठकले पार्टी छाडेर अन्य पार्टीमा गएकाहरुलाई निश्कासन गरेको छ ।