काठमाडौं । काठमाडौंको सानोभरेङस्थित स्वस्तिश्री गुरुकुल आईवी वल्र्ड स्कुलमा किसुनजी स्मृति संसदीय हल निर्माण गरिएको छ ।

नवनिर्मित उक्त संसदीय हलको वसन्त पञ्चमीको अवसर पारेर आइतबार मन्त्रिपरिषद कार्यालयका राज्यमन्त्री उमेश श्रेष्ठले उदघाटन गरेका थिए ।

संसदीय हलको उदघाटन गर्दै मन्त्री श्रेष्ठले स्वस्तिश्री गुरुकुल आई. वी. वल्र्ड स्कुल भएको भन्दै बधाइ पनि दिए ।
यो विद्यालयमा पढ्ने विद्यार्थीहरुलाई संसारकै उत्कृष्ट विश्वविद्यालयहरुमा सहजै भर्ना पाउने अवसर प्राप्त हुने भन्दै मन्त्री श्रेष्ठले गुरुकुल स्कुलको निकै प्रशंशा गरेका थिए ।

सरकारले शिक्षा सम्बन्धि ३ वटा कानुन बनाउन लागेको र विद्यालय शिक्षामा निजी कम्पनी, सामुदायिक र गुठीबाट माध्यमिक विद्यालय संचालन गर्न पाउने व्यवस्था गर्न लागेको मन्त्री श्रेष्ठको भनाइ थियो ।

साथै, उक्त कार्यक्रममा ब्याडमिन्टन खेलका महिला जूनियर डबल तर्फ विश्व वरियताक्रममा सातौं नम्बरमा आउन सफल नेपाली खेलाडी रशिला महर्जनलाई ५० हजार नगदसहित सम्मान गरिएको थियो ।

कार्यक्रममा विद्यालय खेलकुद महासंघका उपाध्यक्ष मोहन कार्की, विद्यालयका संस्थापक प्रबन्ध निर्देशक मिना महर्जन(चित्रकार), प्रिन्सिपल प्रा. डा. हिमलाल घिमिरे, शैक्षिक निर्देशक प्रविन मोक्तान, विद्यालय संयोजक हरिप्रसाद सञ्जेल लगायतको उपस्थिति रहेको थियो ।