काठमाडौं । नेपाल बार एशोसिएसनले न्यायालय सुधारको माग गर्दे गरेको आन्दोलनको सोमवार एक सय दिन पूरा भएको छ ।

न्यायपालिका सुधारका लागि सुरु गरेको आन्दोलनको एक सय दिन पुगे पनि माग पूरा नभएको भन्दै आन्दोलन जारी रहने नेपाल बार एशोशिएसन जनाएको छ ।

न्यायपालिका सुधारका लागि सुरु गरेको आन्दोलनको एक सय दिन पुगेको अवसरमा सोमबार एशोसियसनको कार्यालयमा आयोजना गरिएको पत्रकार सम्मलनमा बोल्दै बार अध्यक्ष चण्डेश्वर श्रेष्ठले माग पूरा नहुन्जेल आन्दोलन जारी रहने बताए ।

उनले आन्दोलनले एक सय दिन पुरा गरिसक्दासम्म प्रधानन्यायाधीश चोलेन्द्र शमशेर जबराले नेपाल बारले न्यायपालिकाका विकृति, विङगति नियन्त्रणको लागि दिएका सुझावहरु कार्यान्वयन गर्न चासो नदिएको दाबी गरे ।

उनले न्यायपालिका सुधारकै विषयमा गर्न लागिएको राष्ट्रिय सम्मेलनसम्म आन्दोलन जारी रहने र त्यसपछिका कार्यक्रम सम्मेलनले नै तय गर्ने बताए ।

पत्रकार सम्मेलनमा न्यायपालिका सुधार सम्बन्धी न्यायाधीश हरिकृष्ण कार्कीको प्रतिवेदनमाथि पछि छलफल गरिने जानकारी श्रेष्ठले दिए ।

न्यापालिका सुधारकै विषयलाई लिएर फागुन १५, १६ र १७ गते राष्ट्रिय सम्मेलनमा न्यायपालिका सुधार र हरिकृष्ण कार्कीको प्रतिवेदनमाथि छलफल गरिने उनले जानकारी दिए ।

फागुन १७ गते सम्मका लागि आन्दोलन निरन्तर जारी रहने र त्यसपछिको कार्यक्रम सम्मेलनले तय गर्ने श्रेष्ठले बताए ।

तीन वर्ष अगाडिदेखि नै न्यायपालिका भित्रको न्यायाधीश नियुक्तिको विषयदेखि न्याय सम्पादनमा बिचौलियाहरुको विगविगी, विसङगति, विकृतिको विषयमा बारले पटक–पटक प्रधानन्यायाधीशलाई ध्यानाकर्षण गराउँदा पनि प्रधानन्यायधीशबाट सुनुवाई नभएको उनको भनाइ थियो ।

न्यायपालिका सुधारको लागि प्रधानन्यायाधीश जवराको वर्हिगमन हुनुपर्ने अध्यक्ष श्रेष्ठले दोहोर्याए ।