काठमाडौँ । स्वास्थ्य तथा जनसंख्या मन्त्रालयमा दुई जना सचिव हुने भएको छ । सोमबार बसेको मन्त्री परिषद्को बैठकले मन्त्रालयमा जनसंख्या हेर्ने गरी प्रशासनतर्फ एक जना सचिव पठाउने निर्णय गरेको हो ।

प्रशासनतर्फ प्रधानमन्त्री तथा मन्त्री परिषद्को कार्यालयमा रहेका सचिवहरुमध्ये मधुसुदन बुर्लाकोटीलाई स्वास्थ्यमा पठाउने तयारी रहेको एक मन्त्रीले बताए । ती मन्त्रीका अनुसार स्वास्थ्य मन्त्रालयमा स्वास्थ्य सेवातर्फ एक जना र जनसंख्या हेर्ने गरी प्रशासनका एक जना सचिव पठाउने निर्णय भएको छ ।

हाल मन्त्रालयमा स्वास्थ्य सेवातर्फका सचिव डा. रोशन पोखरेल छन् । यसअघि मन्त्रालयमा दुई जना सचिव हुँदा पटक–पटक विभिन्न विषयमा विवाद हुँदै आएको थियो । उक्त विवाद बढेपछि सरकारले प्रशासनतर्फका सचिव लक्ष्मण अर्याललाई प्रधानमन्त्री कार्यालयमा काज सरुवा गरेको थियो । अहिले पुनः मन्त्रालयमा दुई सचिव हुँदाको विवाद दोहोरिने देखिएको छ ।