काठमाडौँ । सर्वोच्च अदालतले भोलिदेखि नियमित रूपमा सबै प्रकारका सेवा सञ्चालन गर्ने भएको छ । गत ४ माघको पूर्ण बैठकले कोरोना भाइरस (कोभिड–१९) महामारीको संक्रमण बढेको भन्दै सेवा संकुचन गरेको सर्वोच्चले पुनः सबै प्रकारको सेवा सञ्चालन गर्न लागेको हो ।

गत बिहीबार बसेको पूर्ण बैठकले आगामी १ फागुनबाट सबै प्रकारका न्याय, प्रशासनिक र आर्थिक पक्षलगायतका सेवा सञ्चालन गर्ने निर्णय गरेको अदालतका प्रवक्ता बाबुराम दाहालले जानकारी दिए । कोभिडको नयाँ भेरियन्ट ओमिक्रोन बढे पछि अदालतले गत ५ माघबाट सेवा संकुचन गराउँदै आएको थियो ।

गत ४ माघदेखि २९ माघसम्मको अवधिमा बन्दी प्रत्यक्षीकरण तथा कोभिड महामारीसहित आधारभूत स्वास्थ्य सेवासँग सम्बन्धित र सार्वजनिक महत्वका मौलिक हकसँग सम्बन्धित रिट निवेदनको मात्र सुनुवाई गरेर अन्य सेवा बन्द गरेको अदालत आइतवारबाट भने नियमित सेवामा जाने छ ।

सर्वोच्चका अनुसार झण्डै एक महिनाको सेवा संकुचनको यस अवधिमा बन्दी प्रत्यक्षीकरण, मुद्दा फिर्ता, तामेली एवम् मिला पत्रसम्बन्धी कामकारबाही, मुलुकी फौजदारी कार्य विधिअनुसार थुनुवा रहेका व्यक्तिको निवेदनलगायतका मुद्दामाथि कारवाही र सुनवाईलाई भने निरन्तरता दिईएको थियो ।