काठमाडौँ । एनसेलका ग्राहकले अझै सस्तोमा नेपालभर एउटै कल दरमा भ्वाइस सेवाको लाभ लिन सक्ने भएका छन् । एनसेल आजियाटा लिमिटेडले आफ्नो नेटवर्कभित्र तथा नेपालका अन्य कुनै पनि दूरसञ्चार सेवाप्रदायकको नेटवर्कमा कल गर्दा लाग्ने भ्वाइस कलको महशुल दर करबाहेक १.६२ बनाएको हो ।

कम्पनीले १.९९ प्रति मिनेटबाट घटाएर करबाहेक प्रति मिनेट १.६२ कायम गरेको जनाएको छ । प्रिपेड ग्राहकका लागि लागू भएको यो नयाँ महशुल दरले देशभर समान रुपमा अन्य नेटवर्कमा मेन ब्यालेन्सबाटै पे एज यू गो दरअन्तर्गत कल गर्न अझै सुलभ बनाएको छ ।

यो परिमार्जित नयाँ महशुल दर शुक्रबार (माघ २८) गतेदेखि लागू भएको हो । नयाँ महशुल दरको लाभ लिनका लागि ग्राहकहरुले स्टार १९१०७ ह्याच डायल गरी सेवा निःशुल्क सुरु गर्न सक्छन् ।

नयाँ महशुल दरले ग्राहकलाई मेन ब्यालेन्सबाट अन–नेट र अफ–नेट भ्वाइस कल गर्न सजिलो र सहज बनाउँद छ । आफ्ना ग्राहकलाई विश्वस्तरीय सेवा अनुभवका साथ उत्कृष्ट मूल्य प्रदान गर्न सदा प्रयासरत रहेको कम्पनीले जनाएको छ । नयाँ महशुल दर २०७९ साउन २४ गतेसम्म लागु हुने छ ।