काठमाडौँ । चितवनको राप्ती नगरपालीका ६ हर्दी चोकमा शनिबार बेलुकी दुई ओटा मोटरसाइकल आपसमा ठोकिँदा एक जनाको मृत्यु भएको छ । घटनामा एक जना घाइते भएका छन् ।

टाँडीबाट भण्डारातर्फ जाँदै गरेको ना ६० प ३७८१ नम्बरको मोटरसाइकल र विपरीत दिशाबाट आउँदै गरेका ना ९ प ९६६२ नम्बरको मोटरसाइकल शनिबार बेलुकी ७ बजे ठोकिएका थिए ।

घाइते भएका दुवै मोटरसाइकल चालकलाई उपचारको लागि कलेज अफ मेडिकल साइन्स अस्पताल भरतपुर पठाइएको थियो । उपचारको क्रममा ९६६२ नम्बरका मोटरसाइकल चालक चितवनको खैरहनी नगरपालीका ७ का ४५ वर्षीय कमल चौधरीको मृत्यु भएको हो ।

अर्का मोटरसाइकल चालक राप्ती नगरपालीका ६ का २९ वर्षीय सन्तोष भण्डारीको अवस्था सामान्य रहेको अस्पतालले जनाएको छ । भण्डारीले मदिरा सेवन गरी मोटरसाइकल चलाएको खुल्न आएको इलाका प्रहरी कार्यालय भण्डाराले जानकारी दिएको छ ।