इन्जुरी समयमा घनिफो रोमाहले गोल गरेपछि सहिद स्मारक ‘ए’ डिभिजन लिग-२०७८ अन्तर्गत अन्तिम चरणको खेलमा थ्री स्टार क्लब हारको संघारबाट जोगिएको छ । लिगको १३औं चरणको खेलमा शुक्रबार थ्री स्टार दोस्रो डिभिजनमा घटुवा भइसकेको टोली ब्रिगेड ब्वाइज क्लब (बीबीसी) सँग १-१ को बराबरीमा रोकियो ।

सातदोबाटोस्थित एन्फा मुख्यालयमा सम्पन्न खेलमा प्रशान्त तामाङले गरेको गोलबाट बीबीसीले अग्रता लिए पनि खेलको अन्तिम मिनेटमा सम्हालिन नसक्दा अंक बढ्यो । प्रशान्तले गोलकिपर गुरप्रित सिंहबाट आएको लामो पासलाई मैदानको मध्यभागबाट अघि बढाउँदै गोल गरेका थिए । 

तर, इन्जुरी समयको अन्तिम मिनेटमा घनिफो रोमाहले गोल गरेपछि थ्री स्टार हारको संघारबाट जोगिएको थियो । रोमाहले डोना थापाको पासलाई पोस्टको दिशा दिएका थिए ।

बराबरीसँगै १९ अंक जोडेको थ्री स्टार तालिकाको छैटौं स्थानमा यथावत् छ । थ्री स्टारले १३ खेलमध्ये चारमा जित, सातमा बराबरी र दुई खेलमा हारको नतिजासहित लिगको अन्त्य गर्‍याे ।

यस्तै, दोस्रो डिभिजनमा घटुवा भएको बीबीसीले १३ खेलबाट आठ अंक जोड्यो । बीबीसीले एकमा जित, पाँचमा बराबरी र सात खेलमा पराजयको नतिजा निकाल्यो । लिगमा ११औं चरण चलिरहँदा साविक विजेता मछिन्द्र फुटबल क्लबले उपाधि रक्षा गरेको थियो । त्यस्तै, च्यासल युथ क्लब र ब्रिगेड ब्वाइज क्लब (बीबीसी) दोस्रो डिभिजनमा घटुवा भइसकेको छ ।