काठमाडौँ । गत जनवरी महिनामा एक सय ५० देशका १६ हजार ९७५ जना पर्यटकले नेपाल भ्रमण गरेका छन् । कोरोना महामारीले थलिएको पर्यटन उद्योगमा गत महिना नेपाल भित्रिएका पर्यटकको संख्याले आगामी दिनहरू शुभ रहने संकेत गरेको छ ।

अध्यागमन विभागका अनुसार २०२२ जनवरीमा नेपाल भित्रने पर्यटकमा १० हजार ८१० जना पुरुष र ६ हजार १५७ जना पहिला रहेका छन् । सो महिना नेपाल प्रवेश गर्ने ८ जनाको भने पहिचान खुलेको छैन ।

जनवरीमा अष्ट्रेलियाबाट एक हजार २१३, बंगलादेशबाट एक हजार २३६, चीनबाट ३२१, जर्मनीबाट ३६५, भारतबाट तीन हजार ९१६, बेलायतबाट एक हजार ८२४ र अमेरिकाबाट तीन हजार २५७ जना पर्यटक नेपाल आएको विभागको तथ्यांकले देखाएको छ ।

गत जनवरीमा नेपाल भ्रमणमा रहेका १७ हजार ९८४ जना पर्यटक स्वदेश फर्केका छन् । यसरी फर्कनेमा ११ हजार ६१७ जना पुरुष र ६ हजार ३६१ जना महिला पर्यटक रहेका छन् । फर्कनेमध्ये ६ जनाको पहिचान खुलेको छैन । जनवरीमा कूल ३४ हजार ९५९ जना पर्यटकले नेपालमा आवतजावत गरेका छन् ।

विश्वमा कोरोना महामारी फैलिएपछि सबैभन्दा बढी प्रभावित क्षेत्रमा पर्यटन पनि पर्दछ । कोरोना नियन्त्रण गर्न विश्वभर लकडाउन भएपछि पर्यटकको आवतजावत प्रायः ठप्प बनेको थियो । कोरोना खोपको विकास र प्रयोग बढेसँगै पर्यटकको आवतजावत विस्तारै बढ्न थालेको छ ।

कोरोना महामारीबीच गत वर्ष सन् २०२१ मा नेपालमा १८१ देशका एक लाख ५० हजार ९६२ जना पर्यटकले भ्रमण गरेका थिए ।