काठमाडौं । अमेरिकी सहयोग परियोजना एमसीसी बहसले लामो समय अल्झिएका राजनीतिक दलहरु भोट माग्न एकैसाथ गाउँ छिर्ने तयारी गरेका छन् ।

सरकारको नेतृत्वको गरेको नेपाली कांग्रेस, सत्ता गठबन्धनमै रहेको नेकपा माओवादी केन्द्र, नेकपा (एकीकृत समाजवादी) तथा प्रमुख प्रतिपक्ष दल नेकपा (एमाले) भोट माग्न एकै साथ गाउँ छिर्ने तयारी गरेका छन् ।

सरकारमा रहेको प्रमुख दल कांग्रेस फागुन २९ गतेदेखि दशैभर एक साथ अभियान सञ्चालन गर्दैछ । ‘घर घर जाउँ, कांग्रेस जिताउँ’ अभियान लिएर कांग्रेसले एक महिने अभियान सञ्चालन गर्दैछ । कांग्रेसले ७७ वटै जिल्लामा केन्द्रीय प्रतिनिधिलाई पठाउने निर्णय गरेको छ । कांग्रेसले बुधबार नै पत्रकार सम्मेलन गरी उक्त एक महिने अभियानको घोषणा गरेको छ ।

यस्तै, सत्तारुढ प्रमुख घटक माओवादी केन्द्र पनि निर्वाचन अभियान लिएर गाउँ जाने निर्णय गरिसकेको छ । माओवादी केन्द्रमा चुलिएको एमसीसी विवादलाई थाति राखेर निर्वाचनमा होमिने निर्णय गरेको छ । निर्वाचनका लागि माओवादीले प्रदेश कमाण्डर तोकेको छ भने प्रदेश कमाण्डरको मातहतमा सबै जिल्ला जिल्लामा निर्वाचन अभियान सञ्चालन गर्ने निर्णय गरिसकेको छ ।

सत्ता गठबन्धनकै दल नेकपा एस (एकीकृत समाजवादी) ले निर्वाचन तयारीका लागि आजदेखि केन्द्रीय समिति बैठक बसिरहेको छ । केन्द्रीय समिति बैठकमा पार्टी अध्यक्ष माधव नेपालले एक महिने अभियानको प्रस्ताव अघि सारेका छन् ।
एमालेबाट चोइटिएको नेकपा एसलाई गाउँ गाउँमा संगठन निर्माण गर्नुपर्ने पनि समस्या छ । निर्वाचन अभियानसँगै पार्टी संगठन विस्तारमा जोड दिने उसको तयारी छ ।

प्रमुख प्रतिपक्षी दल नेकपा एमाले पनि निर्वाचनमा होमिने भएको छ । सत्ता गठबन्धनलाई फुटाउने प्रयत्न गरिरहेको एमालेले निर्वाचन लक्षित कार्यक्रमहरु थालिसकेको छ ।

स्थानीय तहको निर्वाचनमा सत्ता गठबन्धन मिलेर निर्वाचनमा होमिएमा भने एमालेले ठूलो चुनौति सामना गर्नुपर्नेछ । यद्यपि गठबन्धन दलहरुले एमसीसीको विषयमा देखाएको द्वैध चरित्रलाई भने आसन्न चुनावमा मसला बनाउने देखिएको छ ।

यस्तै, हिन्दु राज्य र राजतन्त्रको वकालत गर्दै आएको राप्रपाले पनि निर्वाचन लक्षित कार्यक्रम अघि सारेको छ । गणतन्त्रवादी दलहरु भ्रष्टाचारमा लिप्त भएको र राष्ट्रियतासमेत कमजोर बनाएर देशलाई असफल राष्ट्र बनाउँदै गएको भन्दै ब्यवस्थाकै खिलापमा राप्रपा निर्वाचनमा जाँदैछ । निर्वाचन अभियानबारे राप्रपाले औपचारिक घोषणा भने गरिसकेको छैन ।

एमसीसी विरोधी साना दलहरुले एमसीसी राष्ट्रघाती भएको भन्दै ठूला दलहरुको भण्डाफोर अभियान लिएर निर्वाचनमा होमिने भएका छन् ।