काठमाडौँ । पपुवा न्युगिनी (पीएनजी)सँगको दोश्रो एक दिवसीय क्रिकेटमा नेपाल पराजित भएको छ । नेपालले दिएको २७९ रनको लक्ष्य पछ्याएको पीएनजीले ४८‍.३ ओभरमा ७ विकेटको क्षतिमा पूरा गरेको हो ।

टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाएर २७८ रन बनाएको थियो । जवाफी ब्याटिङमा आएको पीएनजीले आफ्नो पक्षमा जित निकालेको हो ।

कीर्तिपुरको त्रिवि मैदानमा भएको खेलमा नेपालका लागि पीएनजीविरुद्ध दिपेन्द्र सिंह ऐरीको शतक प्रहार गरेका थिए । उनले सर्वाधिक एक सय ५ रनको शतकीय इनिङ खेले । उनले एक सय ४० बलमा ७ चौका प्रहार गरेका थिए ।

खराब सुरुवात गरेको नेपालले तेस्रो ओभरको सुरुवातमा ५ रन जोड्दा २ विकेट गुमाएको थियो । कुशल भुर्तेल खेलको पहिलो बलमा गोल्डेन डक हुँदा अनिल शाह तेस्रो ओभरको पहिलो बलमा आउटसाइड एज लाग्दा किपरको हातबाट क्याच भए ।

तेस्रो नम्बरमा आएका देव खनाल र चौथो नम्बरमा दिपेन्द्र सिंह ऐरीले तेस्रो विकेटको लागि एक सय २९ रनको कीर्तिमानी साझेदारी गरेका थिए ।

खेलमा देवले आफ्नो पहिलो अर्धशतक प्रहार गर्दै ७२ रन बनाएका थिए । यस्तै, रोहित पौडेलले ३५ रन, भिम शार्की २६ रन बनाएका थिए ।

बलिङमा नेपालका लागि सोमपाल कामीले सर्वाधिक ३ विकेट लिए । यस्तै, पवन सर्राफले २ विकेट लिँदा कप्तान सन्दीप लामिछाने र आरिफ शेखले १-१ विकेट लिए ।