लण्डन । गैरआवासीय नेपाली संघ (एनआरएनए) ले नेपालमा १ सय कोठा क्षमता भएको अत्याधुनिक बृद्धाआश्रम बनाउने भएको छ ।
संघको नवनिर्वाचित कार्यसमितिको ८४ औ बैठकले काठमाडौ स्थित पशुपति क्षेत्रमा सो आश्रम बनाउने निर्णय गरेको हो ।
सो परियोजना सम्पन्न गर्नको लागि अध्यक्ष कूल आचार्यको १ करोड तथा बैठकमा सहभागी अन्य पदाधिकारी तथा कार्यसमितिका सदस्यहरुबाट ३ करोड ५६ लाख पचास हजार दुई सय बाइस रुपैयाको प्रतिबद्धता प्राप्त भएको संघले जनाएको छ ।

बैठकले संघको आगामी कार्यकाल संचालनको लागि कार्यविधि तयार गर्न उपाध्यक्ष डा। हेमराज शर्माको नेतृत्वमा २ जना महासचिव गौरीराज जोशी र डा केशव पौडेल, प्रवक्ता सोम सापकोटा र शिवकुमार बरुवाल रहने गरी कार्यदल गठन गरिएको छ ।

संघका राष्ट्रिय समिति (एनसीसीमा) भएका समस्या समाधानकालागि महासचिवद्वय जोशी र पौडललाई क्षेत्रीय संयोजकहरुसंग समन्वय गरी समाधान गर्ने जिम्मा दिने निर्णय भएको छ ।
संघका नव निर्वाचित अध्यक्षहरु रविना थापा,डा. बद्री केसी र कुल आचार्यद्वारा सोमबार नवनिर्वाचित पदाधिकारी तथा केन्द्रीय सदस्यहरु आइसीसी सदस्यलाई सपथग्रहण गराएका थिए ।
संघका प्रवक्ताद्धय शिव वरुवाल र सोम सापकोटाद्धारा सोमबार जारी विज्ञप्ति अनुसार संघको अन्तर्राष्ट्रिय समन्वय परिषदको बैठक आगामी ९ अप्रिल २०२२ नेपाली समय ४ बजे बस्ने भनिएको छ ।