काठमाडौँ । नेपाली क्रिकेट टोलीका ओपनर ब्याटर कुशल भुर्तेलले आइसिसी टी–२० ब्याटिङ वरियतामा दुई स्थान सुधार गरेका छन् ।

आइसिसीले बुधबार सार्वजनिक गरेको वरियतामा कुशल २९ औँ स्थानमा उक्लिए । कुशल पछिल्लो हप्ता वरियताको ३१ औँ स्थानमा थिए । यस्तै, वरियताको शीर्ष सयभित्र रहेका अर्का ब्याटर दीपेन्द्रसिंह ऐरी भने पुरानै वरियतामा यथावत् छन् । दीपेन्द्र वरियताको ५१ औँ स्थानमा छन् ।

वरियताको शीर्ष स्थानमा भने पाकिस्तानका कप्तान बाबर आजम र दोस्रो स्थानमा पाकिस्तानकै अर्का ब्याटर मोहम्मद रिजवान यथावत् छन् । यस्तै, तेस्रो स्थानमा दक्षिण अफ्रिकाका आइदेन मार्करम, चौथोमा इङ्ल्याण्डका डेविड मलान र पाँचौँ स्थानमा न्युजिल्याण्डका डेविड कोनवे छन् ।

यस्तै, टी–२० को बलिङ वरियतामा नेपाली टोलीका कप्तान सन्दीप लामिछाने एक स्थान खस्किएका छन् । नयाँ वरियतामा उनी ३७ औँ स्थानमा छन् ।

टी–२० वरियतामा अटाएका नेपालका अर्का बलर अविनाश बोहरा ८१ औँ स्थानमा छन् ।