काठमाडौँ । नेकपा एमालेका अध्यक्ष केपी शर्मा ओलीले नेकपा एकीकृत समाजवादीका अध्यक्ष माधव नेपाललाई आगामी संसदीय निर्वाचनमा तीन सिट ल्याएर देखाउन चुनौती दिएका छन् ।

अध्यक्ष ओलीले पार्टी एकीकरणमा बेला आफूले ५४ सिट दिएको प्रचण्ड र २३ सिट दिएको माधव नेपालले त्यसको दुरुपयोग गरेर पार्टी फुटाएको आरोप लगाए । शुक्रबार काठमाडौँमा आयोजित पार्टी निकट राष्ट्रिय स्वास्थ्यकर्मी संघ, नेपालको चौंथोँ राष्ट्रिय महाधिवेशनमा बोल्दै उनले २३ सिट पाउने हुती नभएको भन्दै माधव नेपाललाई चुनौती दिएका हुन् ।

जनादेशको दुरुपयोग गर्नेलाई देखाउने गरी चुनावको तयारी गर्न पार्टी निकट स्वास्थ्यकर्मीहरूलाई अध्यक्ष ओलीले निर्देशन दिए ।

‘५४ सिट दिइयो प्रचण्डलाई, तर भस्मासुर शैलीमा त्यसलाई दुरुपयोग गरे, ४ वटा सिट आउँदैन भनेर हामीसँग प्रचण्ड मिलेको होइन, माधव नेपाल २२–२३ सिट ल्याउने हुती भएको मानिस हो ? उनको नेतृत्वमा, अब ३ सिट ल्याएर देखाउन त ?,’ उनले भने, ‘त्यो हुती भएका मान्छे हुन्, तर पार्टीभित्रको कुरा दिइयो साथीहरूलाई, यो हिजोको चुनावको परिणाम हो, अब आजको चुनावको परिणाम होइन ।’

अध्यक्ष ओलीले एउटा नागरिकको हैसियतले सरकारले गरेका राम्रा कामको समर्थन गर्न र नराम्रा कामको विरोध गर्न स्वास्थ्यकर्मीले सक्नु पर्ने बताए । उनले मेडिकल कलेज र इञ्जिनियरिङ कलेज खोल्नै नदिन मतियारहरू सक्रिय रहेको आरोप लगाए ।

त्यस अवसरमा अध्यक्ष ओलीले परीक्षण ल्याबसम्म नभएको अवस्थामा कोभिड नियन्त्रणका लागि तत्कालीन आफू नेतृत्वको सरकारले असाधारण सफलता हासिल गरेको स्मरण गरे ।