काठमाडौं । प्रमुख प्रतिपक्षी दल नेकपा एमालेले स्थानीय तह निर्वाचनका लागि उम्मेदवार छनोटको प्रकृया शुरु गरेको छ ।
चैत २४ गतेदेखिनै उम्मेदवार छनोट प्रकृया शुरु गरेको एमालेले गाउँपालिका र नगरपालिकाबाट जिल्लामा नाम सिफरिस गर्न थालेको हो । पालिकाबाट सकेसम्म सर्वसम्मत नाम पठाउने र नभएमा मात्रै विकल्पसहित पठाउन थालेको छ ।

यही ३० गतेभित्र सिफारिस गरिसक्नु पर्ने भएकाले एमाले धेरै जसो स्थानीय तहबाट उम्मेदवार सिफरिस गरेर जिल्लामा पठाउन थालेको छ ।
एमालेले सात सय ५३ वटै स्थानीय तहमा उम्मेदवार छनोट प्रक्रिया सुरु गरेको पार्टीका प्रचार विभागका उपप्रमुख विष्णु रिजालले जानकारी दिए ।

चैत मसान्तभित्र वडा, गाउँपालिका, नगरपालिका, उपमहानगरपालिका र महानगरपालिकाको उम्मेदवार सिफारिस गरिसक्न जारी गरेको अन्तरपार्टी निर्देशन अनुसार छनौट प्रकृया शुरु भैसकेको प्रचार विभागका उपप्रमुख रिजालले बताए ।
एमाले अबको एक साताभित्रै धेरैजसो स्थानीय तहमा उम्मेदवार छनोट गरिसक्नेछ ।

गाउँ तथा नगरपालिकाका वडाध्यक्ष र सदस्यहरूका उम्मेदवारको निर्णय सम्बन्धित वडा र पालिका कमिटीको सिफारिसमा जिल्ला कमिटीले गर्ने, निर्णयमा विवाद आए एक तह माथिल्लो कमिटीमा पठाउने, केन्द्रले आवश्यक ठानेमा कुनै पनि तहको निर्णयमा पुनर्विचार गर्न सक्ने एमालेको उम्मेदवार छनौट निर्देशिकामा उल्लेख छ ।
महानगर र उपमहानगरका उम्मेदवार छनोटमा ढिलाई हुनेछ । महानगर र उपमहानगरका प्रमुख, उपप्रमुखहरूको उम्मेदवार चयन भने सम्बन्धित कमिटीको सिफारिस, जिल्ला र प्रदेश हुँदै केन्द्रीय कमिटीबाट गर्ने एमालेको पछिल्लो निर्णय छ ।

अध्यक्ष केपी ओलीले स्थानीय तहको उम्मेदवार छनोटका ६ वटा आधारसहितको अन्तरपार्टी निर्देशन जारी गरेका थिए । जसअनुसार पार्टी नीति र कार्यक्रमप्रतिको प्रतिबद्धता, निर्वाचित जनप्रतिनिधिको कामको मूल्यांकन, लोकप्रियता र विजयको सुनिश्चितता, आन्दोलनमा योगदान र पार्टीप्रतिको निष्ठा, कार्यक्षमता एवं सुशासन र विकासप्रतिको दृष्टिकोण (भिजन) तथा सन्तुलन र समावेशिताको पक्षलाई आधार बनाएर उम्मेदवार चयन गर्न निर्देशन गरिएको छ ।
एमालेको प्रदेश १, बागमती प्रदेश कमिटी र गण्डकी प्रदेशमा २८ चैतभित्र वडा र पालिकाका उम्मेदवार छनोट गरिसक्ने र निर्णय हुन नसकेका पालिकाका उम्मेदवारको नाम जिल्ला कमिटीले प्रदेश कमिटीमा अनिवार्य पठाउनुपर्ने गरी निर्दैशन दिएको छ । गण्डकीमा त माओवादीसँगको सहकार्यलाई समेत ध्यान दिएर उम्मेदवार छनोट प्रकृया शुरु गरिएको स्रोतको दाबी छ । पार्टीका उपमहासचव एवं गण्डकी प्रदेश इन्चार्ज पृथ्वी सुब्बा गुरुङले गण्डकीमा एमाले र माओवाीबीच सहकार्य हुने संभावना रहेको बताउदै आएका छन् ।
तर यो विषयले औपचारिक रुप लिएको छैन । अहिले भने एमालेले तय गरेको मापदण्ड त्यसअनुसार पालिका कमिटीले ३० चैतभित्र बैठक राखेर सकेसम्म सर्वसम्मत सहमतिका आधारमा जिल्ला कमिटीमा पठाउन निर्दैशन दिइसकेको र कतिपय पालिकाहरुले सिफरिस पठाइसकेका छन् ।
चैतभित्र महानगरपालिका, उपमहानगरपालिका र नगरपालिकाका मेयर–उपमेयर र गाउँपालिकाका अध्यक्ष–उपाध्यक्षहरूको नाम छनोट सम्बन्धित पालिका कमिटीले सर्वसम्मत सहमतिका आधारमा गर्नुपर्ने, तर सहमति नभएमा मेयर–उपमेयर, अध्यक्ष–उपाध्यक्ष दुवै पदमा एक महिला र एक पुरुष अनिवार्य हुने गरी तीन–तीनजनाको नाम सिफारिस गरी जिल्ला कमिटीमा पठाउन एमालेले परिपत्रमा निर्देशन दिएको थियो ।

विवाद नभएको स्थानमा सिधै जिल्ला कमिटीले निर्णय गरी पठाउने व्यवस्था गरिएको छ । विवाद भएमा मात्रै प्रदेश र केन्द्रले निर्णय गर्ने गरी अन्तरपार्टी निर्देशन जारी गरेको छ । उम्मेदवार छनोट र सिफरिस प्रकृया सकिएपछि एमालेले पालिकास्तरीय कार्यक्रमलाई तिब्रता दिनुपर्ने निर्दैशन पनि दिएको छ ।
एमालेले जनवर्गीय संगठनका साथै सबै पालिकाका कमिटीलाई निर्वाचनमा केन्द्रीत हुन निर्दैशन दिएको छ । साथै सम्पर्क मञ्चहरुलाई वैशाख १५ भित्रै आफ्नो निर्वाचन क्षेत्रमा पुगेर पार्टी कमिटीलाई सहयोग गर्न निर्दैशन पनि दिएको छ