काठमाडौँ । नेत्र विक्रम चन्द ‘विप्लव’ नेतृत्वको नेपाल कम्युनिस्ट पार्टीले १२ बुँदे सर्कुलर जारी गरेको छ । पार्टीले केन्द्रीय समिति बैठकपछि मातहतका निकायमा सर्कुलर पठाएको हो ।

कपिलवस्तुमा सम्पन्न केन्द्रीय समिति बैठकले लिएका निर्णयहरू कार्यान्वयन गर्न विप्लवले पार्टीका विभिन्न तहका नेताहरूलाई सर्कुलर पठाएका हुन् ।

सर्कुलरमा नेताहरूको कार्य विभाजन, सम्पत्ति विवरणको खोजी, पार्टी हितविपरीतका गतिविधि गर्नेलगायतका विषयमा रहेको छ ।

सर्कुलरमा स्थानीय तहको निर्वाचनका सन्दर्भमा पार्टीको धारणासमेत समेटेको छ । यस्तै, काठमाडौं उपत्यका पेरिफेरीका जिल्लामा कार्यरत केन्द्रीय सदस्य र जनवर्गीय संगठनका केन्द्रीय सदस्य एवम् फ्याक्सन इन्चार्जको संयोजक प्रकाण्डले गर्ने सर्कुलरमा उल्लेख छ ।

यसैगरी, केन्द्रीय सदस्यहरुको कार्यविभाजन, प्रकाश डुम्रेलाई गल्ती महसुस गराई पार्टी सम्पर्कमा राखी काममा लगाउने, बैतडीका राजेन्द्र विष्ट र उद्योग व्यापार संगठनका प्रकाश बस्नेतको कारबाही फुकुवा, नेता भीम चापागाईँले लाखौँ पैसा उठाएर खाएको आरोप लगाउँदै त्यसबारे छानविन गर्नेलगायतका विषयमा समेत सर्कुलर जारी गरेको छ ।