काठमाडौँ । गत पुस ३ गते कैलालीको जानकी गाउँपालिका ९ अमरावती सामुदायिक वनमा घाँटी रेटेर अर्जुन दासको हत्या आरोपमा प्रहरीले चार जनालाई पक्राउ गरेको छ । मोबाइल चोरी गरेको आरोपमा चार जना मिलेर दासको हत्या गरेको प्रहरीले जनाएको छ ।

हत्या आरोपमा प्रहरीले १९ वर्षीय सुमित साउद, १९ वर्षीय बमे भन्ने बम बहादुर बोहोरा, १९ वर्षीय रोनी परियार भन्ने दिलिप दास र १९ वर्षीय मनोज भण्डारीलाई पक्राउ गरेको हो । उनीहरू सबै मृतक दासकै ठाउँका हुन् ।

उनीहरूले लागु पदार्थ सेवन गरी कुटपिट गर्दै अर्जुनलाई घाइते बनाएका थिए । पछि उनीहरूले साजको रूखमा बाँधेर अर्जुनको घाँटी रेटी हत्या गरेका थिए । उनीहरूलाई रुपन्देही सिदार्थ नगरपालिका १ बेलहिया सिमानाकाबाट गोप्य सूचनाको आधारमा पक्राउ गरेका प्रहरीले जनाएको छ ।

उनीहरूविरुद्ध जिल्ला प्रहरी कार्यालय कैलालीमा कर्तव्य ज्यान कसुरमा मुद्दा दर्ता गरिएको छ ।