काठमाडौँ । निर्वाचन आयोगले काठमाडौँ महानगरपालिकाको नेकपा एमाले मेयरका उम्मेदवार केशव स्थापितलाई स्पष्टीकरण सोधेको छ ।

मेयर पदका स्वतन्त्र उम्मेदवार बालेन शाहमाथि टिप्पणी गरेको भन्दै स्थापितसँग स्पष्टीकरण सोधेको निर्वाचन आयोगले जनाएको हो ।

‘नेपाल कम्युनिष्ट पार्टी एमालेका तर्फाबाट काठमाडौँ महानगरपालिकाको प्रमुख पदको उम्मेदवार केशव स्थापितले सोही महानगरमा प्रतिस्पर्धी उम्मेदवार रहनुभएका बालेन शाहको विषयमा अभिव्यक्ति दिनुभएको सञ्चारमाध्यम तथा सामाजिम सञ्जालबाट जानकारी प्राप्त भएकाले निर्वाचन आचारसंहिता २०७८ अनुकुल नभएकाले सो विषयमा आधार र कारणसहित चौबीस घण्टाभित्र स्पष्टीकरण पेश गर्न आयोगले निर्देशन दिएको छ’ आयोगले जारी गरेको विज्ञप्तिमा उल्लेख गरेको छ ।

यसअघि यौन दुर्व्यवहारसम्बन्धी प्रश्न सोध्ने प्रश्नकर्तामाथि अमर्यादित व्यवहार गरेको भन्दै आयोगले स्पष्टीकरण सोधेको थियो । गत १५ गते काठमाडौँको एक कलेजमा आयोजित कार्यक्रममा स्थापितलाई यौन दुर्व्यवहारसम्बन्धी प्रश्न सोधिएको थियो ।

उक्त प्रश्नको जवाफमा स्थापितले ‘यू आर नाइस लेडी तर थुतुनो ठीक छैन’ भनेका थिए ।