काठमाडौँ । नेपाली कांग्रेसले पार्टीको आधिकारिक उम्मेदवारलाई सहयोग नगरी बागी उम्मेदवारी दिने, उनका प्रस्तावक र समर्थक पार्टीबाट निष्कासित भएको बताउँदै नाम पठाउन आग्रह गरेको छ ।

बिहीबार कांग्रेस मुख्यसचिव कृष्णप्रसाद पौडेलले विज्ञप्ति जारी गर्दै पार्टीका आधिकारिक तथा पार्टीले समर्थन गरेका उम्मेदवारविरुद्ध विद्रोही उम्मेदवार, प्रस्तावक र समर्थकको पार्टी सदस्यता नरहेको सूचित गराएका हुन् ।

पार्टीको आग्रह अस्वीकार गरेका बागी कांग्रेसको विधान २०१७ (संशोधनसहित)को धारा ४ (१३) (ग) बमोजिम पार्टीबाट निस्कासन भएको विज्ञप्तिमा उल्लेख गरिएको छ ।

पार्टीबाट निष्कासित भएका उम्मेदवार, प्रस्तावक र समर्थकको नामावली केन्द्रमा पठाउन जिल्ला कार्य समितिलाई आग्रह गरेको छ ।